2021-йисуз гзаф аялар авай, 4 аял тербияламишзавай дидейриз 56 йисан яшда аваз вахтундилай вилик пенсиядиз фидай ихтияр ава. Гьа са вахтунда дишегьлияр патал пенсиядиз фидай яш 56,5 йис я. Идан гьакъиндай РД-да авай ОПФ-дин пресс-къуллугъди хабар гузва.
РикIел хкин хьи, 5 ва адалай гзаф аялар хайи дишегьлийриз 50 йис хьайила пенсиядиз фидай ихтияр ава. 3 аял авай дидейривай 2023-йисалай 57 йис хьайила пенсиядиз физ жеда. Им 1966-йисуз дидедиз хьайи дишегьлийриз талукь я.
Вахтундилай вилик страховой пенсия къачуз кIанзавай гзаф аялар авай дидеяр патал кьилин шартI аялар 8 йис жедалди тербияламишун ва абурухъ — дидейрихъ 15 йисалай тIимил тушиз страховой стаж хьун, 2021-йисуз 21-далай тIимил тушиз кьилди садаз талукь тир кьадардин хсуси пенсиядин коэффициент (ИПК) хьун лазим я. (ИПК-дин кьадар 2025-йисалди яваш-яваш 50-дал кьван хкаж жеда).
РикIел хкин хьи, са йисни зур жедалди аялрихъ гелкъвей вахтар диде-бубадикай садаз страховой стаж яз гьисабда, эгер икьван чIавалди абурукай сада кIвалахнаваз хьайитIа (вири аялрихъ гелкъуьнай 6 йисалай гзаф тушиз стаж). Идалайни гъейри, страховойдинбур тушир вахтар лугьузвайбурулай пенсиядин коэффициентар эцигда (йисни зур сифте аялдихъ гелкъуьнай, 2 йисни 7 варз кьвед лагьай аялдихъ гелкъуьнай, 5 йисни 4 варз пуд лагьай аялдихъ гелкъуьнай ва 8 йисни са варз кьуд лагьай аялдихъ гелкъуьнай).
Вахтундилай вилик пенсиядиз экъечIдай ихтияр тайинардайла, дидевилин ихтияррикай магьрумнавай ва я аял хвавилиз ва рушвилиз кьабулун амал аламачирди яз малумарнавай дишегьлийриз талукь жедач.
Фикир желб ийин хьи, Махачкъаладин 3-4 аял авай дидейривай исятда РД-дин Пенсионный фондунин клиентвилин къуллугъдиз аялар авайвилин, зегьметдин стаждин, кIелунин ва зегьметдин гьакъидин гьакъиндай вичин пенсиядин ихтиярар чирун патал документар вугайтIа жеда. РД-дин Пенсионный фондуни, чарасузвал аваз хьайитIа, документар кIватIун патал куьмек гуда.
«Лезги газет»
