И йикъара Сулейман-Стальский райондин кьил Нариман Абдулмуталибова райадминистрациядин умуми отделдин кьилин пешекар Тевриз Вердихановадив яргъал йисарин намуслу зегьметдай ва 60 йис тамам хьунихъ галаз алакъалу яз Гьуьрметдин грамота вахкана.
“Тевриз Девришевнади райондин администрацияда кIвалахиз 38 йис я. И йисара ада вич гьар са хиляй дерин чирвилер авай, хиве авай везифайрив жавабдарвал гьисс авуналди эгечIдай пешекар, ачух ва михьи рикI авай инсан яз къалурна. Адан кIвалахдилай чун гзаф рази я”, — лагьана Н.Абдулмуталибова грамота вахкудайла.
Тевриз Вердиханова 1961-йисуз Кьасумхуьрел Ватандин ЧIехи дяведин иштиракчи, ичинви Девриш ва Перихалум Насрулаеврин хизанда дидедиз хьана.
1979-йисуз ЦIийихуьруьн юкьван школа хъсан къиметар аваз акьалтIарай Тевриза, Дербент шегьерда 6 вацран курсара кIелуналди, машинисткавилин пешекарвал къачуна.
2011-йисан 1-мартдилай инихъ Тевриз Девришевнади райондин администрацияда умуми отделдин кьилин пешекар яз кIвалахзава, хиве авай жавабдар везифаяр уьзягъдаказ кьилиз акъудзава.
Лагьана кIанда, райадминистрацияда тамамарзавай гьар са кIвалах жавабдарди, хъсан чирвилер хьун истемишзавайди я. И кар аннамишуналди, кIвалахдивай къерех тахьана, Т.Вердихановади Дагъустандин политехнический колледж (2000-йисуз) кIелна акьалтIарна.
Чпин хизанар, кIвал-югъ хьанвай Тевриз Вердихановадин веледар тир Заира Ставрополь шегьерда, Абдурашид ва Таисия Норильск шегьерда яшамиш жезва, абуру жуьреба-жуьре пешейрин иесияр яз кIвалахзава.
Хазран Кьасумов
