Исраъ Мугьаммад пайгъамбарди (къуй Аллагьдин патай салават ва саламар хьурай вичиз) Мекка шегьерда авай аль-Гьарам мискIиндай аль-Къудсада (Иерусалим) авай мискIиндиз йифен сафар авун я.
Миърадж исраъдилай гуьгъуьниз чи Пайгъамбарди (къуй Аллагьдин патай са-лават ва саламар хьурай вичиз) Жабраил малаикдихъ (Аллагь рази хьурай вичелай) галаз Аллагь-Тааладин эмирдалди Буракь шивдал алаз ирид цаварал ва гьадалайни виниз (яни садазни малум тушир чкадиз: (я малаикриз, я жинриз, я инсанриз) хкаж хьун я.
Ибн Сагьда и вакъиа гьижра ийидалди 18 вацран вилик хьайиди тестикьарзава.
Исраъ валь-Миърадж Пайгъамбарди (къуй Аллагьдин патай салават ва саламар хьурай вичиз) вичин михьи беденни руьгь гваз авунва. Гьавиляй им лап еке, тажуб жедай аламатрикай сад яз гьисабзава Вичин виридалайни кIани лукI патал авур.
Пак тир Къуранда лагьанва:
Мана: “Шукур хьурай Адаз, Ни йифиз Вичин виридалайни кIани лукI Меккада авай аль-Гьарамдай акъудна Иерусалимда авай аль-Акъса мискIиндиз тухвай, патав гзаф мублагь ва гуьрчег майваярни ва-цIар гвай. Аллагьди Вичин къуват ва къудрат къалурун патал. Гьакъикъатда, Адаз вири крар малум я, хъсандиз ван къвезва ва хъсандиз аквазва” (Сура “Исраъ, 1”).
Меккадай Иерусалимдиз куьч хьун ва цаварал хкаж хьун Аллагь-Таалади чи Пайгъамбардиз (къуй Аллагьдин патай салават ва саламар хьурай вичиз) ракъурнавай керематрикай сад я. И кар Пайгъамбардин (къуй Аллагьдин патай салават ва саламар хьурай вичиз) кьилел, ада меккавийриз Исламдин дуьз рекьел эвер гуз башламишай вахтунилай инихъ тайин цIуд йис тамам хьайила, атана.
Дугъриданни, вичин теклифдиз жаваб яз, адаз ван жезвайди ва аквазвайди анжах хъуьруьнар, акси гафар ва амалар тир. Гьикьван четин тиртIани, ам архайин тушир ва вичин кIвалах давамарзавай.
Аль-Исраъ валь-Миърадждин йифиз чи Пайгъамбар (къуй Аллагьдин патай салават ва саламар хьурай вичиз) Каабада авай “гьиджру Исмаил” тIвар алай чкадал Гьамзатанни Жагьфаран арада ксанвай. Са бязи риваятри тестикьарзавайвал, Пайгъамбардин (къуй Аллагьдин патай салават ва саламар хьурай вичиз) патав чIехи пуд малаик — Жабраил, Микаил ва Исрафил (Аллагь чпелай рази хьурай) — пайда хьана.
Абуру, патарив ксанвайбуруз хабар тежедайвал, Пайгъамбар (къуй Аллагьдин патай салават ва саламар хьурай вичиз) къачуна. Жабраил малаик (Аллагь рази хьурай вичелай) Пайгъамбарни (къуй Аллагьдин патай салават ва саламар хьурай вичиз) галаз Замзам булахдин чешмедал атана.
Инал Жабраил малаикди (Аллагь рази хьурай вичелай) Пайгъамбардин (къуй Аллагьдин патай салават ва саламар хьурай вичиз) хуру ачухна, са кIусни тIарвални иви галачиз, адан рикI къеняй акъудна, пуд сеферда Замзамдин целди чуьхвена, ахпа ам ахлакьдивни имандив ацIурна, пайгъамбарвилин муьгьуьр (печать) эцигна. Гуьгъуьнлай рикI вичин чкадал эхцигна, хурни кIев хъувуна ва ада виликдай хьиз кIвалахиз эгечI хъувуна.
(КьатI ама)
Абдулзагьир Атаханов
