И мукьвара Мегьарамдхуьре, А.Исрафилован тIварунихъ галай спортзалда, ММА-дай Дагъустандин Кубок къазанмишун патал акъажунар кьиле фена. Ана чи республикадин жуьреба-жуьре районрай 150-дав агакьна жаван спортсменри иштиракна.
Абурун арада Сулейман-Стальский райондай тир спортсменарни авай. И акъажунра иштиракай, чпи ММА-дай спортдин мастервиле кандидат-тренер Буба Бабаеван гъилик вердишвилер къачузвай 3 спортсменди кIвенкIвечи чкаяр къазанмишна. ИкI, Шамил Мазукаев (70 кг-дал къведалди заланвал авайбурун арада) ва Мадрид Ашурбегов (75 кг-дал къведалди заланвал авайбурун арада) — 1, Фазил Эмировни (75 кг-дал къведалди заланвал авайбурун арада) 2-чкайриз лайихлу хьана. Мубаракрай!
Накь, 3-мартдиз, Сулейман-Стальский райондин спортдин, туризмдин ва жегьилрин крарин рекьяй комитетдин директор Надир Эфендиев спортсменрихъ галаз гуьруьшмиш хьана, абурув грамотаяр ва дипломар вахкана, спортсменрихъ гележегда мадни еке агалкьунар хьана кIанзавайди ва абурук еке умудар кутунвайди лагьана.
«Лезги газет»
