Чи ватанэгьлияр — гьар сана
Гьар са инсанди кIвалахдин рекье къазанмишзавай агалкьунар ада вичин кеспидиз майиллувал авунин, везифаяр чешнелудаказ, нетижалудаказ кьилиз акъудунин, кар алакьдай ерияр раижунин тегьеррилай аслу я. Шадвилелди къейд ийин, чIехи агалкьунар къазанмишзавай жегьил ватанэгьлийрикай чав уьлкведин, гьатта къецепатан шегьеррайни мукьвал-мукьвал шад хабарар агакьзава.
Вичин алакьунралди машгьур хьанвай жегьил лезгийрикай сад алай вахтунда Москвада яшамиш жезвай ва ана кIвалахзавай Камилла Наримановна Аллагькъулиева я. Ам вилик чIехи макьсадар эцигнавай, абур уьмуьрдизни кечирмишзавай, гзаф савадлу, марифатлу лезги руш я.
Зегьметдин рехъ ада 7 йис идалай вилик маркетингда башламишна. Ада маркетинг адетдин кIвалахдив ваъ, машгъулатдив хьиз эгечIзавай рикI алай кардив гекъигзава. 2015-йисалай ада Россиядин Сбербанкда пешекарвиле кIвалахна. И мукьвара ам Сбердин (гила Сбер лугьузва) махсус проектрин хилен регьбервиле тайинарнава.
Сбердин хиле жавабдар къуллугъдал хьанвай К.Аллагькъулиевади анаг гзаф мумкинвилер гузвай, гзаф акьуллу ксар авай гегьенш майдан яз гьисабзава.
Камилла Наримановна Аллагькъулиевадин ери-бине Сулейман-Стальский райондин Алидхуьряй я. Москвада лезгийрин арада ам Камилла Стальская хьиз машгьур я. Ам 1996-йисан 30-январдиз Москвада къуллугъчидин хизанда дидедиз хьана. Адахъ М.В.Ломоносован тIварцIихъ галай МГУ-да къачунвай кьилин кьве образование ава: 2017-йисуз социологический факультет куьтягьна, 2019-йисуз — идара авунин ва инновацийрин кьилин школа, стратегиядин маркетинг. Камилладиз урус, ингилис, француз ва, гьелбетда, хайи чIални хъсандиз чизва.
“Аял вахтара зун хуьруьз хъфейла, хуьруьнбур захъ галаз урус чIалал рахаз эгечIдай, за михьи лезги чIалал жавабар гайила, абур тажуб жедай”, — лугьузва ада.
Дидедин патай адан чIехи буба — Мегьамед Хидирович — райондин собранидин депутат, Хив райондин ЦIийи Фригърин хуьруьн администрациядин кьил хьана. Вилик девирда Мегьамед Хидировича дагълух чкайра авай агьалияр Дербент райондиз куьчарунин месэлаяр тешкилна. ЦIийи Фригърин мектебдин бине кутурдини гьам я. Дагъустандин мектебрикай сифте яз и мектеб компьютерралди таъминарна. Бубадин патай мукьвабурукай Камиллади иллаки вичин ими Надир Тарикъулиевичал дамахзава. Адакай виликдай Дагъустандин Халкьдин Собранидин депутат ва Каспийск шегьердин налогрин идарадин регьбер хьана.
Адан буба жегьил вахтунда Москвадиз куьч хьана ва ана МФТИ-дик — Россиядин технологический кьилин вуздик экечIна. Камилладин стха Асланни бубадин рекьяй фена — МФТИ куьтягьна, алай вахтунда США-дин Калифорния штатда карчивилин проектрал машгъул я.
Чирвилерихъ майилвалун ивидик квай жегьил пешекарди аял чIавалай вичин алакьунар къалуриз хьана. Мектебда тафаватлудаказ кIелайвиляй ам олимпиадайрин гьамишан иштиракчи тир. 11-классда кIелзавай вахтунда ада 12 олимпиадада иштиракна. Вирироссиядин олимпиадайра са шумудра агалкьунар къазанмишна, гуьгъуьнлай губернатордин стипендия къачуна. Чирвилерин рекьяй вини дережайрив агакьнаватIани, ада мадни кьакьан кукIушрихъ майилвалзава.
Малум хьайивал, и мукьвара К.Аллагькъулиевадин тешкиллувилинни пешекарвилин алакьунар гьукуматдин шабагьдалди къейдна — адав РФ-дин Президент В.В. Путина чухсагъулдин чар вахкана. Кьилди къачуртIа, а чарче икI кхьенва: “Ватандин ЧIехи дяведа Гъалибвал къачурдалай инихъ 75 йис тамам хьуниз бахшнавай мярекатар тешкилуник, гьазурвилер акуник ва кьиле тухуник еке пай кутунай Аллагькъулиева Камилла Наримановнадиз — “Россиядин Сбербанк” ПАО-дин управленидин (Москва шегьер) пешекардиз”.
“За гьисабзавайвал, инсанди вичин вилик гьамиша макьсадар эцигун ва абурув агакьдай рекьерни вичи арадал гъун лазим я. Им гзаф итижлу кар я. Гьар са кар чирунал рикI хьун, еке алахъунар авун, зегьмет чIугун, инновациядин проектар арадал гъунихъ къаних хьун — и крар себеб яз зун гьукуматдин шабагьдиз лайихлу хьана”, — лу-гьузва К.Аллагькъулиевади.
Къуй адан вири мурадар кьилиз акъатрай.
К.Ферзалиев
