Чи жегьилар
Айза Закаряевна Атемова ДГУ-дин экономикадин факультетдин 3-курсунин студентка я. “Региондин экономика” пешедай дерин чирвилер къачузва. Идахъ галаз сад хьиз, гьа вичин пешедай ада неинки чи рес-публикада, Россияда, гьакI дуьньядин дережадани кьиле тухузвай илимдин семинарра, конференцийра иштиракзава.
Месела, алатай йисуз ада Вирироссиядин жегьилрин арада “Идара ая!” лишандик кваз кьиле тухвай алишверишдин мумкинвилериз анализ гунин акъажунра гъалибчидин кубок къачуна.
Идалайни гъейри, Айзади студентрин арада экономикадин теориядай кьиле тухвай олимпиадайра кьве сеферда галаз-галаз кьилин чкаяр кьуна. Гьа саягъда маса жуьредин конкурсрани ам вилик хьана.
Жегьилди экономикадин илимдани инанмиш камар къачузва. Адан гъиликай хкатай илимдин 17 кIвалах чи вузрин илимдин журналра чапнава. Гележегдани адахъ республикадин экономика вилик тухудай цIийи ва бегьерлу рекьер ахтармишдай фикир ава.
Чна адаз 8-Мартдин сувар мубарак авунихъ галаз сад хьиз, кIелунрани, илимдани цIийи агалкьунар хьун алхишзава.
Са алава: Айза Закаряевнадин ери-бине Докъузпара райондин Миграгърин хуьряй я. Адан диде-буба Мегьарамдхуьре яшамиш жезва. Вични гьана зегьметчи чIехи хизанда тербияламиш хьана.
Чи мухбир
