Чи ватанэгьли, медицинадин илимрин кандидат, Москвадин 115-нумрадин поликлиникадин урологиядин отделенидин заведующий  Загьир  Агъамова  регьбервал гузвай мергьяматлувилин “Сагълам хуьр” проектдин макьсад Дагъустандин дагълух хуьрера ватанэгьлийрин сагъламвал ахтармишун, сагъарунин кардани алакьдай куьмекар гун я. Къейд ийин хьи, мергьяматлувилин проект Загьид духтурди вичин хсуси такьатрихъ кьилиз акъудзава.

И чIавуз медицинадин рекьяй агьалийрив хъсан куьмек агакь тийизвай дагълух хуьрериз асул фикир гузва. РикIел хкин, идалай вилик Москвадин кьилин поликлиникайра жуьреба-жуьре пешейрай кIвалах­завай са жерге тежрибалу духтурри, кьиле З.Агъамов аваз, Мегьарамдхуьруьн райондин Хъартас-Къазмайрин ва Агъул райондин кьве хуьре агьалияр кьабулнай, абурун сагъ­ламвилин гьалар ахтармишна, герек меслятар къалурна. Лап четин гьалда авайбур уьлкведин меркезда сагъар хъувун патални алакьдай куьмекар теклифзава. Са шумуд хуьре “Сагълам хуьр” серенжем тешкилайдалай кьулухъ хейлин хуьрерин, азарханайрин кьиле авайбуру, мергьяматлувилин серенжемдикай хабар хьайи агьалийрини Загьир Хидировичаз мад ва мад атун теклифна.

ИкI, мукьвара, хъуьтIуьн гьавадин мише­къатвилизни килиг тавуна, Москвадин духтуррин десте кьакьан дагълара авай ЦIунти ва ЦIумада районриз фена. Малум тирвал, медицинадин рекьяй куьмек гунин месэла дагълух хуьрера са акьван хъсан гьалда авач. Гьавиляй дагъвияр чеб духтурриз къалуриз вердиш туш.

Нубатдин сеферда духтуррин дестеди кьве райондай кьуд юкъуз 1000-далай гзаф агьалияр кьабулна, абурун сагъламвилин гьалар ахтармишна, герек тир меслятар къа­лурна­.

Москвадин духтуррин дестедиз гележегда Дагъустандин хейлин хуьрериз фидай фикир ава: Белиждиз, Аштыдиз, Тарумовкадиз, Агъа Казанищедиз ва икI мад.

Загьир духтур и йикъара Сулейман-Стальский райондин кьил Нариман Абдулмуталибовахъ галазни гуьруьшмиш хьана. Гуьруьшдин вахтунда абур райондин сергьятра здравоохраненидин хиляй са жерге крар кьилиз акъудунин меслятдал атана. Гьа жергедай яз, алай йисан гатуз “Сагълам хуьр” проект и райондани кьилиз акъудда.

Мергьяматлувилин, сувабдин важиблу кар кьилиз акъудзавай Загьир духтурдиз вирибуру алхишарзава. И рекье адахъ къуй мадни еке агалкьунар хьурай!

Лезги  Фетгьуьллагь