Нетижайрилай рази я

Аргентинадин гьукумдарри коронавирусдиз акси Россиядин “Спутник V” вакцина ишлемишунин нетижаяр хъсанбур яз гьисабнава. “Новости” РИА-ди хабар гузвайвал, ихьтин къимет уьлкведин регьбердин куьмекчи С.Николиниди гана.

Адан гафаралди, вакцинадин нетижаяр хатасузвилинни таъсирлувилин жигьетдайни писбур туш. Гьа са вахтунда гьукумдарди­ Россиядин муькуь вакцинайризни (“ЭпиВакКорона” ва “КовиВак”) Аргентинади итиж ийизвайдакай лагьана. Ада гъавурдик кутурвал, Аргентинади Россиядин илимдиз ва технологиядиз ихтибарзава.

Гъил къахчуна кIанзава

Эрменистандин премьер-министр Н.Пашиняна митингдал вичин терефдарривай гъил къахчун тIалабна. Идакай “Sputnik Армения” чешмеди хабар гузва.

Пашинянан фикирдалди, Эрменистандин аслу туширвилин 30 йисан тарихда идалай виликни хьайиди хьиз, вичини хейлин гъалатIриз рехъ гана. “Исятда ихтилат чи гьукуматдикай ваъ, кьилди закай я”, — Еревандин юкьвал кIватI хьанвай инсанрихъ элкъвена, лагьана Пашиняна.

Ада Эрменистандин ватандашривай, диаспорайривай ва тестикь тахьанвай Дагълух Къарабахдин агьалийривайни вичелай гъил къахчун тIалабна.

1-мартдиз Еревандин кьилин майдандал Пашинянан терефдаррин ва гьукуматдин дараматдин вилик квай чIехи куьчедал адаз аксибурун митингар кьиле фена.

Дагълух Къарабахда кьиле фейи дяведа магълуб хьайидалай кьулухъ Эрменистанда сиясатдин кризис 25-февралдилай мадни къизгъин хъхьана. Эрменистандин Яракьлу къуватрин Генштабди Н.Пашинян отставкадиз ракъурун истемишзавай малумат чапна. Вичин нубатда, премьер-министрди Генштабдин кьил О.Гаспарян кIвалахдилай алудун истемишна. Амма уьлкведин президент А.Саркисяна къалмакъалдик квайбуруз меслятдал атуниз эвер гана.

Гиманлу я

ВОЗ-дин кьетIен гьалариз талукь программайрин директор М.Райанан фикирдалди, коронавирусдин аксина тухузвай женг акьалтIардай вахтуникай исятда лугьуз жезвач. Идакай “ТАСС” чешмеди малумарна.

Ада къейд авурвал, вакцинацияди коронавирусдиз садлагьана ваъ, яваш-яваш таъсирда. ВОЗ-дин илимдин кьилин къуллугъ­чи С.Сваминатанан фикирдалди, тIугъвалдихъ галаз тухузвай женг йисан эхирдалди акьалтIариз хьун гиман алай кар я. Адан фикирдалди, начагъ жедайбурун, кьиникьрин кьадар вакцинациядин куьмекдалди йисан эхирдалди хейлин тIимилариз жеда.

Зеленскийдин умудар

Донбассдин гьалар себеб яз, Украинадин президент В.Зеленскийди Евросоюзди Россиядиз къалурзавай аксивилер мадни мягькемаруник умуд кутазва, хабар гузва “Интерфакс-Украина” чешмеди.

Адан гафаралди, Киевди уьлкведин кьиблединни рагъэкъечI­дай пата ислягьвал, меслятвал арадал атуник умуд кутазва ва гьавиляй Брюсселдиз Россиядиз акси санкцияр саналди гьазурун теклифзава.

Малум тирвал, Донбассда мулкарин патахъай авай къалма­къа­лар давам жез 6 йисалайни артух я. Киевдилай аслу туширвал малумарайдалай кьулухъ ДНР-дизни ЛНР-диз акси гьерекатар Украинадин гьукумди 2014-йисан апрелдиз кьилиз акъуднай.

Луту-птувилин цIийи амал

Гьарамзадайриз россиявийрин хсуси делилар TeIegram-ботдай жагъурдай амалар чир хьанва. Кибертахсиркарвилин цIийи къайдадикай “Коммерсантъ” чешмеди хабар ганва.

Информациядин хатасузвилин “СерчИнформ” отделдин начальник А.Дроздан гафаралди, лутуйри чпиз чир хьайи малуматар­, де­лилар шантаж патал ишлемишзава. Кьилди къачуртIа, хсу­си де­­­л­илар мукьва-кьилийрив ва дустарив агакьарда лугьуз, гьеля­гьар­ кьуналди, абуру чпин “кIириник” акатайбурувай пул истемишзава.

Пешекарри къейдзавайвал, ихьтин макъамра гьарамзадайрин шантаждихъай кичIе хьун лазим туш. Эгер тахсиркарриз инсанри пул ракъурайтIа, абурун шантаж мадни давам хъхьун мумкин я.

Часпардал цал эцигда

Къанунсуздаказ санай масаниз элячIунин, куьч хьунин ва часпардихъ галаз алакъалу маса тахсиркарвилерихъ галаз женг тухунин макьсаддалди Доминиканский республикадин президент Л.Абинадера Гаитидихъ галаз авай часпардал цал эцигунин фикир малумарнава. Идакай ада парламентдин вилик авур рахунра раижна, хабар гузва “Лента.ру” чешмеди.

Къейдзавайвал, 2021-йисан кьвед лагьай паюна къунши уьлкведихъ галаз авай часпардал хатасузвал хуьнин серенжемар мягькемарда. И кардиз гзаф къуватар ва технологиядин такьатар серфдайвал я. Кьилди къачуртIа, гзафни-гзаф къалмакъалар арадал­ къвезвай участок кьве цал чIугуналди кIевирда, камераяр, ра­дарар ва инфракрасный системаяр кардик кутада. Президентдин фикирдалди, ихьтин серенжемри къанунсуздаказ часпардилай элячIунин, наркотикар ва чуьнуьхнавай улакьар санай масаниз акъудунин тахсиркарвилерал эхир эцигда.

«Лезги газет»