Ихьтин лишандик кваз и йикъара Махачкъаладин 61-нумрадин юкьван школада (директор — Къ.О.Дибиров) Дуьньядин халкьарин дидед чIалар хуьнин йикъаз талукьарнавай шадвилин межлис тешкилнавай. Иниз Дагъустандин писателрин Союздай, республикадин газетринни журналрин редакцийрай, жуьреба-жуьре тешкилатрай яратмишдай ва жемиятдин векилризни теклифнавай.
“Лезги газетдин” редакциядай ана кьилин редактор Мегьамед Ибрагьимова ва и цIарарин авторди иштиракна.
Лагьана кIанда, и мектебда хайи лезги чIал ва литература 114 аялди чирзава. И кардиз школадин директордин заместитель, филологиядин илимрин кандидат, бажарагълу жегьил шаиррикай сад тир Халидин Жаферович Эльдарова регьбервал гузва. Адахъ галаз ина, хайи чIалан тIямар шегьердин аялриз чириз, муаллимар тир Марифат Эльдаровади (мярекатдин программа ва вири сегьнеяр туькIуьрайди), Гуьлмира Шихрагьимовади, Эльвира Агьмедовади (концертдин программа кьиле тухвайбур) зегьмет чIугвазва. Нетижаярни хъсанбур я. Школадин аялри эхиримжи са шумуд йисуз дидед чIаларай тешкилай олимпиадайра, конкурсра кIвенкIвечи чкаяр кьуна, махсус дипломар, пишкешар къачуна.
И мярекат гьакьван карчивилелди, устадвилелди гьазурнавай. Аялри (асул гьисабдай 5-10-классра кIелзавайбуру) урус, авар, дарги, къумукь, лезги, табасаран, яхул чIаларалди шиирар хуралай кIелна, манияр лагьана. Аялрин рахунар чIехи экрандилай къалурзавай Дагъустандин гуьзел пипIерин ва машгьур инсанрин шикилри генани таъсирлу, яб гузвайбуруз мукьва ийизвай.
Школадин аялри неинки чпиз хайи чIалар чидайди, гьакI чпелай лап хъсандиз кьуьлер ийиз, милли музыкадин алатрал гьаваяр тамамариз, милли парталрин ва безекрин гуьзелвал машгьуриз алакьдайдини субутна.
Мярекат тешкилай залда ачухнавай милли чIаларин ктабрин, чи халкьарин заргаррин, халичайрин устIаррин гъиликай хкатнавай гуьзел затIарин выставкадини вирибурун фи-кир желбзавай.
Милли чIалар милли адетрин, къанажагъдин, хайи чилин ва чи тарихдин руьгь къалурзавай кьетIен алем ва девлет тирди иниз атанвай вири мугьманрини къейдна. Абуру аялри ва муаллимри чIугунвай зегьметдин тарифна, чпин эсерар кIелна, школадин библиотекадиз ктабар багъишна, артистри манияр тамамарна.
Лезгийрикай чи тIвар-ван авай манидар, Махачкъаладин 9-нумрадин юкьван школадин дидед чIалан муаллим Адиля Хаметовади вичин гуьзел сесиналди ва устадвилелди хайи чIал ва искусство генани вини дережада машгьурна. Адан гьар са мани гурлу капаралди къаршиламишна.
Эхирдай школадин руководстводи гьам мярекат гьазурайбуруз, гьам иниз атанвай мугьманриз сагърай лагьана.
Мердали Жалилов
