Чи ватанэгьлияр — гьар сана
Чи йикъара духтуррал кIвалахдин рекьяй ацалтзавай артухан парцикай вирибуруз хабар ава. Дуьньяда пайда хьанвай тIугъвалди инсаният кIанзни-такIанз вичиз муьтIуьгъарна. Уьлкведин шегьеррин жуьреба-жуьре азарханайри, медидарайри, чпин асул везифаяр кьвед лагьай дережадал эцигна, коронавирусдин аксина кIвалахна. Им иллаки коронавирусди кьил хкажнавай макъамда арадал атай гьаларин истемишун хьана.
ЧIехи шегьерра духтурвалзавай чи хейлин ватанэгьлийрини коронавирусдихъ галаз женг чIугуна, гзаф кьадар инсанар кьиникьикай къутармишна. Уьлкведин меркезда ихьтин шартIара кIвалахзавайбурукай сад вичин ери-бине Мегьарамдхуьруьн райондин Хуьрелрилай тир Эмир Гьажимегьамедович Гьуьсенбегов я.
Ам 1975-йисан 27-декабрдиз Махачкъалада къуллугъчидин хизанда дидедиз хьана. 1995-2001-йисара ада Дагъустандин госмедакадемияда кIелна. 2001-2003-йисара Москвада Склифосовскийдин тIварцIихъ галай тади куьмекдин НИИ-дин ординатурада “травматология-ортопедия” пешедай чирвилерни тежриба артухарна.
Тамам чирвилер къачунвай хъсан пешекардиз зегьметдин рехъ башламишдай чка жагъурун четин акъвазнач. 2003-йисуз ам Москвадин 71-нумрадин клиникадин азарханадиз кьабулна. Са шумуд йисуз ина пешедин рекьяй, гуьгъуьнлай Москвада футболдин клубдин духтурвиле кIвалахна (2007-2011-йисара). 2011-йисалай инихъ РФ-дин оборонадин министерстводин ЛРКЦ-да (лечебно-реабилитационный клинический центр) травматолог-ортопед я. Ада Москвадин 1-нумрадин центральный военный госпиталдани зегьмет чIугвазва.
Духтурди хайи ва акъаж хьайи чкаяр сагъар хъувунин карда инсанриз куьмекзава. Сагъар хъувурбурукай хейлинбуру духтурдин пешекарвилелни дикъетлувилел гьейранвалзава. Ихьтин мисалар чаз интернетдайни жагъана.
Интернетдин махсус сайтда Эмир духтурдин гьакъиндай са ватандашди икI кхьизва: “Эмир Гьажимегьамедовича тежер кар кьилиз акъудна! Операция дуьз тахьуникди тIар хьайи зи кIвач сагъарунин кар ада вичин хивез къачуна… Муькуь кIвачин метIен жалгъа дегишарунин регьят тушир кар духтурди хъсандаказ кьилиз акъудна. Къе чун бахтлу я, гележегдин уьмуьрдикай, сиягьатрикай фикирзава. Куьне авур хъсанвал чи рикIелай садрани алатдач. Къуй куьн ва куь багърияр гьамиша сагълам ва шад хьурай”.
“Эмир духтур Аллагьдин патай пай ганвайбурукай я. Адаз халисан пешекардин вири ерияр хас я: еке тежриба, начагъбурухъ галаз хъсан рафтарвал, дуьздаказ диагноз эцигун ва кар чиз азар сагъарун. Къизилдин гъилер я”, — кхьизва маса ватандашди.
И келимаяр кIелайдалай кьулухъ духтурдин кIвалахдин гьакъисагъвиликайни тежрибалувиликай артухан ихтилатар хъувун тавуртIани жезва. Аквазвайвал, адалай инсанар рази я. Гьа им духтурдин инсанвални алакьунар къалурзавай делил я.
Эмир Гьуьсенбегован хизанда кьве веледдиз — рушазни гададиз — тербия гузва.
Ватанэгьлидин гьакъисагъ зегьмет РФ-дин оборонадин министрдин махсус медалдалди, госпиталдин кьиле авайбуру грамотайралди, чухсагъулдин чараралди къейднава.
Къуй адахъ кIвалахда мадни еке агалкьунар, уьмуьрда шадвилер гзаф хьурай!
К.Ферзалиев
