ДАССР-дин 100 йисан юбилейдин лишанлу вакъиадиз талукьарнавай спортдин ва маса мярекатар республикада гзаф кьиле тухузва. ИкI, и мукьвара Мегьарамдхуьруьн районда волейболдай райондин чемпионат хьана. Идакай “Лезги газетдиз” райондин администрациядин пресс-къуллугъди хабар гана.
Мегьарамдхуьруьн 2-нумрадин ДЮСШ-дин спортзалда кьиле фейи спортдин и серенжемда райондин 8 командади иштиракна. Тешкилатчи райондин физический культурадин ва спортдин отделдин директор Эльбрус Шагьвеледова къейд авурвал, райондин кьил Фарид Агьмедован тапшуругъар кьилиз акъудунин, спорт вилик тухунин сергьятра аваз ина агьалияр массовый спортдал машгъуларунин макьсаддалди мукьвал-мукьвал акъажунар, чемпионатар тешкилзава. Ихьтин серенжемрин эвелимжи макьсад сагълам уьмуьр кьиле тухун пропаганда авун, спортдин кьилдин жуьреяр машгьурун, жегьил-жаванар куьчедин чIуру таъсирдикай хкудун я.
Чемпионатда Советский хуьруьн команда 1-чкадиз лайихлу хьана. Кьвед ва 3-чкаяр, талукь тирвал, Гъепцегьрин ва Гилийрин командайри кьуна. Гъалиб хьайибурув шабагьар вахкана. И чемпионат кьиле тухуник лайихлу пай кутур Мирзебег Агъабеговазни чухсагъул лагьана.
«Лезги газет»
