Дагъустандин Пенсийрин фондуни а кардин гьакъиндай рикIел хкизва хьи, гражданар чпин уьмуьрда жезвай дегишвилерикай ведомстводиз хабар гуниз мажбур я. ГьикI лагьайтIа, ПФР-дин бюджетда артухан пулар гун арадал атун мумкин я.
РФ-дин Пенсийрин фондунин рекьяй са жерге пулар гузва. И карни кIвалахунилай, яшамиш жезвай чкадилай, вузда кIелунилай ва я армияда къуллугъунилай аслу жезва. Вири дегишвилерин гьакъиндай гражданин Пенсионный фондуниз хабар гуниз мажбур я. Государстводин идарайри талукь тирвал пулар гун акъвазарда ва я вахтуналди гудач. Акси дуьшуьшда гражданинди законсуздаказ къачур пулар гуьгьуьллудаказ ва суддин къайдада вахкун лазим я.
80 йисалай гзаф яшар хьанвай инсанрихъ, сад лагьай группадин инвалидрихъ ва я инвалид аялрихъ гелкъуьнай гьакъи тайинардайла, зегьмет чIугунин делил кар алайди я. Ихьтин пособие анжах кIвалах тийизвайбурувай къачуз жеда. Гьа са вахтунда студентди вичин бадедихъ гелкъвезва лагьана пул къачузвай дуьшуьшар гьалтзава, ахпа, гатун каникулрин вахтунда официальнидаказ кIвалахал акъваззава, и кардин гьакъиндай ПФР-диз хабар гуз рикIелай алатзава. КIвалахал акъвазайдалай гуьгъуьниз къачур пулдин такьатар им артухан пул къачун я ва абур тамамдаказ вахкун лазим я.
Рузи гудай кас (кормилец) амачирвиляй пенсия къачузвай жегьил ксари йикъан вахтунда кIелзаваз хьайитIа, абуруз пенсия 23 йисалди гузва. ГьикI лагьайтIа, очно кIелзавай студентрихъ кIвалахдай ва чеб пулдин такьатралди таъминардай мумкинвал авач. Эгер студентди юкъуз кIелзавай чкадай акъудна, заочнидаказ кIелиз хьайитIа, рузи гудай кас амачирвилин пенсия адаз хгудач.
Армиядиз эвер ганвайвилин гьакъиндайни ПФР-диз хабар гун лазим я. И дуьшуьшда диде-буба, рузи гудай кас амачирвилин пенсия хгудач. ГьикI лагьайтIа, армияда къуллугъдай вахтунда ам государстводи таъминарзава.
Артухан пул къачунин себебрикай сад рагьметдиз фенвай пенсионердин банкдин картадай законсуздаказ пулдин такьатар къачунни жеда. Пенсионер кьейидалай гуьгъуьниз адан мукьва-кьилийриз ва маса ксариз адан банкдин картадикай менфят къачудай ихтияр авач.
Луту-птувилелди артухан пулар къачузвай дуьшуьшарни жезва. Пенсийрин фондуниз пенсия тайинарун патал тапан документар вугузва, къецепатан уьлквейрин мулкунал пенсия къачунин делил далдаламишзава. Артухан пул къачур гражданиндивай ам гуьгьуллудаказ элкъуьрна вахкуз жеда. Законодательствода клиентри къачур артухан пулар ПФР-диз элкъвена вахкудай жуьре тайинарнава. Артухан пул къачурди чир хьайила, ПФР-дин органри сифте тахсир квай касдиз и кардин гьакъиндай хабар гуда, гуьгьуьллудаказ пул вахкун теклифда. Эгер и серенжемди нетижа гун тавуртIа, къачунвай артухан пул суддин приставрин федеральный къуллугъдин подразделенийри суддин къарардалди мажбуридаказ вахчуда. И дуьшуьшда а касди къачунвай артухан пулунилай гъейри, ПФР-ди суддиз вугунай харжнавай пуларни вахкана кIан жеда.
«Лезги газет»
