Ростов-Баку шегьредин “Джемикентский” постунал Ватан хуьзвайбурун йикъаз талукьарнавай мярекат шад гьалара кьиле фена.
Мордовия Республикадай иниз командировкадиз ракъурнавай полициядин къуллугъчийрин дестедиз суварин югъ тебрикиз КПП-дал Дербент райондин кьил Мавсум Рагьимов, адан заместителар — Сафтар Саттарзаде, Садир Эмиргьамзаев, Икрам Бебетов, советник Гьажимурад Абакаров, райондин общественный палатадин председатель Фетулла Фетуллаев, “Сад тир Россия” партиядин чкадин отделенидин секретарь Нурудин Мирзоев, Дагъустандин машгьур артистар, кьуьлердай “Каспий” ансамбль ва масабур атанвай. Шад мярекат полициядин гимн тамамаруналди башламишна.
Анал рахай Мавсум Рагьимова,Фетулла Фетуллаева кlватl хьанвайбуруз сувар тебрикна, дуьньяда ислягьвал, хизанра шадвилер, бахтар хьун алхишна.
Эхирдай М.Рагьимова Мордовия Республикадин полициядин дестедин ва “Джемикентский” КПП-дин къуллугъчийрив чухсагъулдин чарар вахкана.
Мярекатда иштиракиз атанвай эстрададин гъетери, кьуьлердайбуру инал вижевай концертдин программани къалурна, виридан гуьгьуьлар цицIи авуна.
Мордовия Республикадин полициядин дестедин ва “Джемикентский” КПП-дин къуллугъчийри мярекатдин иштиракчийриз чпин патай савкьатар гана ва рикlел аламукьдай шикил яна.
Къагьриман Ибрагьимов
