И мукьвара Сулейман-Стальский райондин КIварчагърин хуьре Гьабиб Аллагьвердиеван тIварунихъ галай бокс вилик тухудай центрада 2003-2004 ва 2007-2008-йисара ханвай жаванрин арада боксдай Дагъустандин Кьиблепатан зонадин кIвенкIвечивал къазанмишун патал акъажунар кьиле тухвана. Спортдин серенжемдин тешкилатчи РД-дин Кьиблепатан зонадин старший тренер Альберт Межидов тир.
Турнирда Дербент шегьердай ва Кьиблепатан Дагъустандин районрай тир 24 командадик кваз, санлай къачурла, 120-дав агакьна пагьливанри чпин устадвал къалурна. Заланвилин 30 категориядай кьиле фейи акъажунар 3 юкъуз давам хьана. ИкI, кIвенкIвечивал патал акъажунрин нетижада 1-чкадиз Дербент (8 спортсменди 1-чкаяр кьуна) шегьердин команда лайихлу хьана. 2 ва 3-чкаяр, талукь тирвал, Сулейман-Стальский (7 спортсменди 1-чкаяр кьуна) ва Къайтагъ районрин (6 спортсменди 1-чкаяр кьуна) командайри къазанмишна.
Сулейман-Стальский райондин командадик кваз кIвенкIвечи чкаяр кьур спортсменри тренерар тир кIварчагъви Альберт Межидован (1-чкаяр кьур Мурад Гьажиханов, Артем Агъамегьамедов, Агьмедагъа Шамсудинов, Гьамзат Агъаев, Надирбег Жабраилов ва 2-чкаяр кьур Рустам Рамазанов, Майбулагь Алиагьмедов, Асхад Агъамегьамедов) ва агъастIалви Роберт Нагъиеван (1-чкаяр кьур Эльхам Мевлидинов, Бахтияр Гьажимегьамедов ва 2-чка кьур Султан Султанов ) гъилик вердишвилер къачузва.
Турнирда гъалиб хьайибуруз ва призерриз талукь дережайрин медалар, грамотаяр гана. Виридалайни хъсан боксерар, тренерар ва судьяярни махсус призар-кубокар гуналди къейдна.
Тренер А.Межидовахъ галаз хьайи куьруь суьгьбетдай малум хьайивал, зонадин кIенкIвечивал къазанмишай жаванри (2003-2004-йисара хайибуру — Махачкъалада ва 2007-2008-йисара хайибуру — Къизилюртда) гила мартдин эвел кьилерай Дагъустандин кIвенкIвечивал патал акъажунра чпин алакьунар къалурда.
Чи мухбир
