Афгъанистанда интернациональный буржи тамамариз, чи гзаф жегьилар  фена. Абурукай сад Герейханов Мисрихан Герейханович я. Ам 1963-йисан 3-февралдиз Дербент райондин Белиж поселокда, хизанда 4-велед яз, дидедиз хьана.

Адан буба кесиб инсан тир. Девир акьван четинди тир хьи, а вядеда ругуд велед чIехи авун, кIелиз тун зарафатдин кар тушир. Герейхан бубадиз уьмуьрдин рекьера уькIуь-цуру гзаф акуна. Адан ери-бине Мегьарамдхуьруьн райондин Чахчарин хуьряй я. Амма Белиждиз кIвалахиз фейи Герейхан бубади гьана вичиз муг кутуна, яшамиш хьана­.

Мисрихан кIелунрал рикI алай викIегь ученик тир. 1979-йисуз Белижда сифтегьан школа акьалтIарна (гимназия №1).

1981-йисуз Советрин Армиядин жергейриз фена. Адан къаст ватанпересвилин буржи лайихлудаказ тамамарун тир. Амма кьисметди Мисрихан Афгъандин къизгъин женгериз акъудна.

Диде-бубадихъ я йифен ахвар, я йикъан кьарай амачир. А дяведа телефвилер, хирер­ хьайибур тIимил тушир. Мисрихан контузия хьана. Са кьадар вахтунда Карши шегьерда госпиталда къаткурна…

Интернациональный буржи намуслувилелди кьилиз акъудна хтайдалай кьулухъ вичин рехъ ада Белижда, СПТУ-да чирвилер къачунилай гатIунна. Водитель-автослесарвилин пеше къачуна, са шумуд йисуз консервийрин заводда кIвалахна. Ам хейлин медалриз лайихлу хьана: “Ватандин вилик лайихлувилерай”, “Игитвиляй”, “Во­ину-интернационалисту СССР” ва икI мадни.­

Афгъанда кьиле фейи женгерикай суьгьбет авун, абур рикIел хкун адаз кIандач, амма чара авачиз, сад-кьведаз вичин кьилел атай дуьшуьшрикай ахъайда.

Мисрихан Герейханович гьамиша халкьдихъ рикI кузвай чIехи ватанперес, герек чIа­вуз­ куьмек гуз гьазур вафалу кас, чарадан гьал­дикай хабар кьадай къени инсан я.

Алай вахтунда, пуд велед эвленмишна, вичин уьмуьрдин юлдашдихъ галаз Белижда яшамиш жезва.

Умрият  Рагьимова