13-февралдиз Белижда Советрин Союздин Игит Абас Исрафилован тlварунихъ галай гимназияда Ватандилай къецепата къуллугъдин везифаяр тамамарай россиявияр рикlел хкуниз талукьарнавай югъ къейдна.
Шад гьалара кьиле фейи мярекатда Дербент райондин кьил Мавсум Рагьимова, РД-дин Халкьдин Собранидин депутатар — Ферзилагь Исламова ва Эрик Ибрагьимова, райондин администрациядин кьилин заместителри, Белиж поселокдин кьил Рамиз Гьабибулаева, райондин дяведин, зегьметдин, яракьлу къуватрин ва къанун-къайда хуьдай органрин ветеранрин советдин председатель Гьуьсейн Яхшибаева, райондин общественный палатадин председатель Фетулла Фатуллаева, аскерри-афгъанвийри, гимназиядин юнармецийрин дестейри, муаллимри ва аялри иштиракна.
Мярекат М.Рагьимова ачухна ва ада Афгъанистанда кьиле фейи вакъиаяр, ана телеф хьайибур гьар йисуз гьуьрметдивди рикlел хкизвайди, афгъанви ветеранриз жедай куьмекар гузвайди, ихьтин мярекатри афгъанвияр тир игитрин чешнейралди жегьилриз ватанпересвилин тербия гунин карда важиблу роль къугъвазвайди къайдна.
— Къе чун Белиж поселокда кlватl хьун гьакlан дуьшуьшдин кар туш — давамарна ада. — Афгъанистанда телеф хьайи Советрин Союздин Игит Абас Исрафилов Белиждай я. Чна игит рухвайрал дамахзава.
Анал рахай Рамиз Гьабибулаеван, Ферзилагь Исламован, Гьуьсейн Яхшибаеван ва масабурун фикирар сад тир: интернациональный буржи тамамарай кьегьал рухвайрин игитвилерал дамах авун, акьалтзавай несилдиз игитрин чешнейралди ватанпересвилин тербия гун.
Аялри чпин патай кlватl хьанвайбуруз Афгъанистандин, ватанпересвилин темайрай сегьнеяр къалурна, манияр лагьана, кьуьлер авуна.
Райондин кьили аскеррив-интернационалистрив ва 1999-йисуз Дагъустандал вегьей террористрин международный бандайрин вилик пад кьур ополченцийрив юбилейдин медалар вахкана. Эхирдай Абас Исрафилован обелискдал цуьквер эцигна, рикlел аламукьдай шикилар яна.
Къагьриман Ибрагьимов
