Лаврова жаваб гана
США-дин терефди Россиядин “Спутник V” вакцинадикай авунвай шаклувилин ихтилатар бинесузбур тирди чи уьлкведин къецепатан крарин министр С.Лаврова раижна. Кьилди къачуртIа, ада Того Республикадин МИД-дин кьилихъ галаз хьайи гуьруьшдилай кьулухъ тешкилай пресс-конференциядал Америкадин администрациядин гафариз жаваб гана. Идакай “Новости” РИА-ди хабар гузва.
Америкавиди, гуя Россияди и дарман маса уьлквеяр вичелай аслу хьун патал кардик кутунвайди я лугьуз, са бинени авачир баянар гана.
Лаврова Россиядин рафтарвилер къецепатан уьлквейрихъ галаз са нин ятIани таъсирдилай аслу яз ваъ, “кьве терефдин хийирни” фикирда кьуна, арадал къвезвайди я лагьана.
Къейд ийин, коронавирусдиз акси яз Россияда арадал гъанвай “Спутник V” вакцина дуьньяда регистрация авунвай сад лагьай дарман я. Россиядин алимри арадал гъанвай и вакцина алай вахтунда Виридуьньядин здравоохраненидин тешкилатдин виридалайни хъсан цIуд вакцинадин сиягьда ава. Эхиримжи йикъарин делилрал асаслу яз, дуьньяда къадалайни гзаф уьлквейра “Спутник V” вакцина кьабулнава.
Азербайжандик тахсир кутуна
Инсанар яшамиш жезвай чкадин мукьув гуьллеяр ахъайна лугьуз, Ереванди Азербайжандин яракьлу къуватрик тахсир кутуна, хабар гузва “Sputnik Армения” чешмеди.
Азербайжандин армияди Сюникдин областдин хуьрерин патарив гъвечIи ва еке калибрдин яракьрай цIай гунин гьерекатар кьиле тухузва. Ихьтин фикир инсанрин ихтиярар хуьнин рекьяй Эрменистандин векил А.Татояна малумарна.
Ада Эрменистандин сергьятчийри Агарак ва Егвард хуьрерин патав чIугур видео раижна. Адан фикирдалди, арадал атанвай гьалари ислягь уьмуьр кьиле тухузвай инсанрин ихтиярар, секинвал къурхулувилик кутазва. Сюникдин область Дагълух Къарабахдин гуьзчивилик хьайи мулкарин сергьятдал ацалтзава, дяведин нетижада анаг Азербайжандин гьукумдин гуьзчивилик акат хъувуна.
Тапан хабарар чукIун тавун патал
Госдумадин информациядин сиясатдин рекьяй комитетдин председателдин заместитель С.Боярскийди малумарайвал, тахсиркарвилер кьиле тухунай тахсир кутунихъ галаз алакъалу гьакъикъатдихъ галаз кьан тийизвай, тапан хабарар чукIурзавай сайтриз талукь яз суддин къарар галачиз къадагъаяр-сергьятар тайинарун лазим я. Ихьтин баян депутатди “Лента.ру” чешмедиз ракъурнава.
Ада гъавурдик кутурвал, Госдумадиз теклифнавай къанундин проект инсанар фитнедикай хуьнин мураддихъ элкъуьрнава. 2019-йисуз кьиле тухвай хабарар кьунин серенжемди къалурна хьи, чIехи пай россиявийри чеб интернетда буьгьтенрик акатайди тестикьарна.
Гьелелиг лугьуз жезвач
Россияда ВОЗ-дин векил тир М.Вуйновичан фикирдалди, коронавирусдин тIугъвал куьтягь жедай вахт исятда лугьуз жезвач. Идакай ада “Россия 1” телеканалдин эфирда лагьана.
Адан гафаралди, тIугъвал акьалтIуникай рахун са шумуд делилдикай-себебдикай ибарат хьун лазим я. Кьилди къачуртIа, дуьньядин вири пипIера коронавирусдик начагъ жезвайбурун кьадар гьа са вахтунда агъуз аватун лазим я. Амма кьилин месэла адакай ибарат я хьи, сифте нубатда здравоохраненидал алай артухан пар алатна кIанда.
15-февралдиз ВОЗ-дин кьил Т.Гебреисуса ихтилатайвал, алай йисан эвел кьилелай COVID-19 азардик начагъ жезвайбурун кьадар кьве сеферда тIимил хьанва. Адан фикирдалди, исятда авай гьалари тIугъвал гуьзчивилик кутаз хьунин умудар гузва.
17-февралдин делилралди, дуьньяда коронавирус акатнавайбурун умуми кьадар 110 миллиондилай алатнава. Россияда коронавирусдик начагъ хьайибурун кьадар 4 миллиондилай артух хьанва.
Коронавирусди виридалайни гзаф США-дин агьалияр акIажарнава. Адан гуьгъуьнал Индия, Бразилия, Великобритания, Россия ала.
Эрдоганан баян
Иракдин кеферпата туьркерин есирар яна кьейи куьрдерин боевикриз куьмекар гузва лугьуз, Туьркиядин президент Р.Эрдогана США-дик тахсир кутунва. Туьркерин регьбердин гафар “Хюрриет” газетди раижнава.
Эрдогана малумарайвал, терроризмдиз рехъ тагунин гьакъиндай тир икьрардизни килиг тавуна, США-ди РПК-дин (Рабочая партия Курдистана) боевикрин пад кьазва. Эрдогана Байденаз РПК-диз хъсандиз килигуниз, кьуд пад фагьумуниз эвер гана.
Къейд ийин, идалай вилик Туьркиядин гьукумдарри куьрдерин боевикри Иракдин кеферпата авай туьркер-есирар кьейидакай хабар ганай. Амма куьрдери а есирар Туьркиядин ВВС-дин ягъунрикди кьейиди я лугьузва.
«Лезги газет»
