Алатай гьафтеда Сулейман-Стальский райондин ЦIийи Макьарин хуьре Дагъустандин культурадин лайихлу къуллугъчи, Урусатдин писателрин ва журналистрин союзрин член, “Шарвили” фондунин, Гьажибег Гьажибегован премийрин лауреат, инженер-механик, марифатлу, мугьманперес хизандин кьил, кьуд хцин, хтулрин, птулрин буба, Кьиблепатан Дагъустанда гзафбуруз шаир яз чизвай Шагьабудин Нурдинович Шабатован 70 йисан юбилей хуш гьалара къейдна.
Адаз и шад вакъиа тебрикиз Сулейман-Стальский райондин кьил Нариман Абдулмуталибов, культурадин управленидин начальник, Дагъустандин халкьдин шаир Майрудин Бабаханов, райондин образованидин къуллугъчийрин профкомитетдин председатель Халилбег Халилбегов, меркездай “Лезги газетдин” сиясатдин отделдин редактор Нариман Ибрагьимов, ДаркIушдилай школадин виликан директор Севзихан Севзиханов, райондин администрациядин къуллугъчи Мурад Алибегов, чкадин тежрибалу муаллим Рамазан Аливердиев, Хив райондай муаллимар — Къачмаз Меликов, Эвес Алискеров, Белиждай композитор Къагьриман Ибрагьимов, шаир Гъулан-Герек, Дербентдай писатель Демирбег Эмирбегов ва гьакIни мукьвабур, дустар атанвай.
— Шабатов Шагьабудин неинки са чи райондин, гьакIни маса чкайрин агьалийризни хъсан инсан, пешекар, шаир хьиз малум я, — лагьана юбилярдиз хайи югъ мубаракдайла Нариман Абдулмуталибова. — Ада милли эдебиятдик кутазвай пай лайихлуди я. Адан ктабар, эсерар акьалтзавай несилдиз гьакъисагъ зегьметдин, ахлакьдин, марифатдин, ватанпересвилин тербия гунин карда вижевай чешмеяр я. Ам вич лагьайтIа, чи жегьилар патал хъсанвилин чешне я. Инсанвилин акьалтIай ерияр ва бажарагъ себеб яз чна ваз гьуьрметни ийизва, Шагьабудин Нурдинович, ви эсерар хушвилелди кIелни ийизва, абуруз лайихлу къиметни гузва. Алай вахт, тIугъвал фикирда кьуна, вуна межлисдин сергьятар гуьтIуь авунватIани, райондин культурадин ва образованидин идарайра ви яратмишунриз талукьарнавай жуьреба-жуьре мярекатар тухуда. Вун сагъдиз акун, ви къелем гьамиша кардик хьун, вуна райондин жемиятдин уьмуьрда иштиракун, яратмишдай гьевес квадар тавун чаз гьамиша хуш я.
Н.Абдулмуталибова Ш.Шабатовав Гьуьрметдин грамотани пишкеш вахкана.
“Жувакай…” ктабда Ш. Шабатова грекрин шаир, Нобелеван премиядин лауреат О.Элитисан гафар эпиграф яз ганва: “И дуьньядал яшамиш хьун гзаф азаблу кар я, гьа са вахтунда регьятни я, эгер тамамарай крарал вун ашукь, рази яз хьайитIа”.
Лугьун лазим я хьи, Шабатован уьмуьр регьятди хьанач. ГъвечIи чIавалай адаз азабарни, четинвилерни акуна, кьилел бедбахтвилин дуьшуьшарни атана. Лап мишекъат шартIара дагъдин хуьре яшамиш хьун, аялзамаз набут дахдин куьмекчидиз элкъуьн, маса хуьрериз физ кIелун, 1960-йисуз хуьр арандиз эвичIайла, дахдихъ галаз кIвалер эцигун, хизандиз куьмекун патал совхозда акатай вири жуьредин кIвалахар авун, чIехи хциз мехъерзавай юкъуз диде автомашиндик акатна рагьметдиз фин, хвавилин буржи итимвилелди кьилиз акъудун, хуьрени, кIвалахай чкайрани, рекье-хуьлени инсанвилин ерияр вине кьун…
Шаирдин рикIел хкунрай са шумуд цIар: “За, сифте фялевал авуна (гьеле школада амаз), жуваз алукIдай шейэр къачурла ва гумай пул дахдив вахкайла, ада дидедиз разивилелди лагьанай: “Пери, зун къе мад са фикирдикай азад хьана. Гадади вичин кьил акъудда. Ада къе зун шадарна. Гележегдани жув гьакI твах, чан хва, гьалалдин рекьеваз, зегьмет чIугваз. Зун умудрикай магьрум яз тамир гьа!”.
Тунач ада дах умудрикай магьрум яз. Хъсандиз кIелни авуна, Советрин Армиядани къуллугъна, анай лейтенант яз хтана (кьве йиса къуллугъзавай аскердиз лейтенантвилин чин гун тек-бир жезвай кар я), совхозда зегьметни чIугваз кьилин образование, инженер-механиквилин пеше къачуна, “Зардиянский” совхозда механиквилин, кьилин инженервилин ва жавабдар маса къуллугъар баркаллувилелди кьилиз акъудна, хуьр патал хейлин крар авуна, залан азардин къармахрай викIегьвилелди экъечIна ва къад йисалай виниз “Лезги газетдин” хсуси корреспондентвиле устадвилелди кIвалахна.
Шад межлисдал рахай юлдашри Шабатован уьмуьрдиз, инсанвилин лайихлувилериз, яратмишунриз талукь пара хуш гафар лагьана, ада хуьруьнвийриз, дустариз, танишриз авур хъсан крар рикIел хкана, хизандин, иллаки Шабатован далу, даях, илгьамдин нур Халуман тIварцIихъ рикIин сидкьидай алхишарна.
Къейд ийиз кIанзава, дустарин рикIяй къвезвай гафари уьтквем ва назик рикI авай шаирдин вилерал накъварни гъана. Ада вичин ва хизандин патай межлисдик атай виридаз юкь агъузна икрамна ва сагърай лагьана.
Абад Азадов
