Ван авуна
Гьуьрметлу “Лезги газетдин” редакция! За газетдин (2021-йисан 4-февраль, №5) 2-чинай, Ярагъ Мегьамедан тIварунихъ галай мергьяматлувилин фондунин регьбер Гьажибуба Рустамован чIал вилик тухудай мергьяматлувилин фонд арадал гъун теклифзавай макъала кIелна. Анай чир жезвайвал, миллетдин ва чIалан кьисметди гьеле фадлай секинсузвал гьисс ийизвай касди хьиз, чарчин авторди халкьдин вилик чаз виридаз менфятлу теклиф эцигзава. За а макъала неинки теклиф, гьакIни Лезгистандиз чIал хуьнин барадай тIалабун хьизни гьиссзава. Эгер адан теклиф, авторди вичи кхьизвайвал, районрин, РД-дин Халкьдин Собранидин ва РФ-дин Госдумадин депутатри, ватанэгьлийри кьабулайтIа, за умудзава, хайи чIал вилик тухунин четин месэлайрикай са шумуд кьилиз акъуднавайдай гьисабиз жеда.
2019-йисуз за Хивда чIалан конференциядал авур докладда ДГУ-дин филологиядин факультетдин урус ва Дагъустандин чIаларин отделенидик лезгийрикай экечIайди тек 2 аял я (регъуь тиртIани) лагьайла, гуьгъуьнай хьайитIани, гьич са чиновникдини ялав алай рекъемдиз фикир хганач. А вахтунда чи стха миллет тир табасаранрин 2 райондай 6 аялди дидед чIал хкянавай. Ихьтин гьалар арадай акъудун патал чна вирида къуватар садна кIанда. И кардилай лезги чIалан кьисмет аслу я. Мадни башкъа, и месэладив чи халкьдин вилик-кьилик квай жавабдар гьакимарни жавабдарвилелди, къайгъударвилелди эгечIун герек я. И жигьетдай заз Сулейман-Стальский район, анин администрациядин кьил Нариман Абдулмуталибов чешне яз къалуриз кIанзава. Ада регьбервал гузвай райондин администрациядин патай са шумуд йисуз ДГУ-дин филфакдин студентриз стипендиядал пулдин премия алава хъийизвай. Алахъунри цуькверни ахъайзавай, емишарни гъизвай, яни ДГУ-дик лезги чIал чириз экечIзавай студентрин кьадар 1-2 ваъ, са шумудра гзаф тир. Амма гила? Чи халкь къвез-къвез фер гузвай, Пушкинан махунин чанах хьтин чIалан иеси жезва. Килигиз акъвазунилай четинвилерай экъечIдай рекьер жагъурун кутугай кIвалах я.
“Вирт, вирт лугьуналди сив ширин жедач”, — лугьуда халкьди. Бажарагълу экономист Гьажибуба Рустамова чи вилик эцигнавай теклиф веревирд авуниз, дериндай алцумуниз лайихлуди я. “Меслятди гъалибвилихъ ялда”, — лугьузва мисалда. Чи гьуьрметлу пешекарди, дуьньядин уькIуь-цуруди дадмишнавай агъсакъалди, къарагъарнавай месэла “вирт, вирт” лугьунинди ваъ, сив ширинарун патал дуьз ва важиблу рехъ хкягъунинди я. Эгер хийирлу маса теклифар аваз хьайитIа, са шакни алачиз, гьабуруни чаз зиян гудач.
Макъалада авторди кхьизва: “Гьелбетда, фонд арадал гъун регьят кар туш. Амма и кардик вири халкьди къуьн кутуртIа, арадал нетижани къведа”. За фикирзава хьи, и гафариз яргъалай яб гудай ва я фонд арадал гъуник вичивай жедайвал къуьн кутун тийидай чи халкьдин векил жедач. Гьаниз килигна, за “Лезги газетдин” редакциядивай шаз заз газетдин премия яз къалурнавай 2000 манат тешкилиз кIанзавай фондунин счетдиз ягъун тIалабзава. Къуй ам зи патай, тIимилди ятIани, хийирлу фондуниз кьил кутунин пишкеш яз хьурай.
Вуна халкьдиз къачун теклифзавай кам сеферлуди хьурай, Гьажибуба Рустамов. Аллагьди ви фикирдик лувар кутурай ва чи халкь гьамиша адан къаюмвилик кваз хьурай.
Абдул Ашурагъаев
