Играми газет кIелзавайбур! Шаз, 2020-йисуз, “Лезги газетдин” редакцияди сифте яз газет кIелзавайбурун арада, диндин рекьяй нихъ гьихьтин чирвилер аватIа чирунин макьсаддалди махсус конкурс кьиле тухванай. Конкурсдин нетижайрал асаслу яз, 1-чка Ахцегь райондин Луткунрин хуьряй тир Мугьаммад Мегьамедова (кьилин пишкешни — “Xiaomi Regmi 8 64 Гб” смартфон гьадаз кьисмет хьанай), 2-чка Мегьарамдхуьруьн райондин Билбил-Къазмайрилай тир Ханбике Магьарамовади ва 3-чка Дербент райондин Белиж поселокдай тир Гьасан Гьуьсейнова кьунай. Савкьатрилайни дипломрилай гъейри, абуруз пулдин премиярни ганай.
Гъалибчияр тебрикай чIавуз редакцияди Ислам диндиз талукьарнавай конкурс гьар йисуз тешкилдай къарар кьабулнай. Аллагьди гайитIа, цIи, кьвед лагьай сеферда, чна и серенжем сивер хуьдай Рамазандин вацра (алай йисан майдин варз) тухуда.
Къейд ийин хьи, конкурсдин суалар газетдиз 2020-йисан июндилай инихъ акъатзавай диндин рекьяй алим Ямин Мегьамедован макъалайрин бинедаллаз гьазурда. Яни жавабарни гьа макъалайрай жагъида.
Гъалибчийриз (сифтегьан пуд чка кьурбуруз) “Лезги газетдин” редакциядин дипломар ва махсус савкьатар гуда.
Конкурсдин суалар чна Рамазандин вацраз мукьва газетдин “Дин” рубрикада чапда.
«Лезги газет»
