И мукьвара Кьурагь райондин КIирийрин хуьруьн спортдин школа-интернатда (СОСШИ) волейболдай ветеранрин арада, Россиядин Игит Зейнудин Батманован экуь къаматдиз бахшнавай турнир кьиле фена. Идакай “Лезги газетдиз” райондин пресс-къуллугъдай хабар гана. Районрин командайрин арада кьвед лагьай сеферда тешкилнавай спортдин и мярекатда Кьиблепатан Дагъустандин виридалайни хъсан командайри иштиракна.
Къейд авун лазим я хьи, цIи и турнир ДАССР арадал атана 100 йис тамам хьунин юбилейдин сергьятра аваз кьиле тухвана. Тамам 6 сятда давам хьайи къизгъин къугъунрин нетижада гъалибчияр ва призёрар тайин хьана. ИкI, Дербент шегьердин команда 1-чкадиз лайихлу хьана. 2 ва 3-чкаяр, талукь тирвал, Кьурагь ва Мегьарамдхуьруьн районрай тир спортдин ветеранрин командайри кьуна. Гъалиб хьайи командайрив медалар, грамотаяр, пулдин ва спортдин пишкешар вахкана. Турнирда виридалайни хъсан къугъвайбур яз гьисабай Къазиев Магьарамаз (Кьурагь), Омаров Омараз (Дербент), Къарибов Заураз (Мегьарамдхуьр), Талибов Бубадиз (Белиж посёлок) спортдин серенжемдин тешкилатчийрин патай пулдин пишкешар гана.
Гъалибчияр тебрик авунин мярекатда “Кьурагь район” МР-дин кьилин заместитель Рамазан Катибова, КIирийрин хуьруьн советдин кьил Аким Алидарова, КIирийрин СОСШИ-дин директор Надир Тагьирова, Зейнудин Батманован стха Батман Батманова иштиракна.
Чи мухбир
