“Спутник V” теклифзава

Чехиядин президент М.Земана уьлкведа Россиядин “Спутник V” вакцина ишлемишдай ихтиярар ганва. Идакай ада “Frekvence 1” радиодай малумарна.

Земана вичи гьамиша пешекаррин ахтармишунрал, теклифрал амал ийизвайдакай лагьана. ИкI, уьлкведин минздравдин профессор Р.Примулади адаз Россиядин вакцинадикай менфят къачун теклифна. Земана рикIел хкайвал, тIвар кьунвай вакцина Венгрияда исятда ишлемишзава. Земанан гафаралди, коронавирусдик гьар юкъуз уьлкведин 150 агьали рекьизва. Ада къейд авурвал, герек атайтIа, вакцинадин жигьетдай Россиядивай тIа­лабда.

Къейд ийин, Россияда арадал гъанвай “Спутник V” вакцина гьелелиг 12 уьлкведи разивилелди кьабулнава. Абурун арада Белоруссия, Аргентина, Сербия, Палестина, Боливия, ОАЭ, Туьркмения, Венгрия, Пакистан, Венесуэла, Алжир ва Парагвай ава.

Бине авачир веревирдер

США-дин яракьлу къуватрин стратегиядин командованидин кьил, адмирал Ч.Ричарда Россиядихъ ва я Китайдихъ галаз ядер­ный дяве арадал атунин мумкинвилиз къимет гана. Идан гьа­къиндай ада Америкадин Военный ва гьуьлерин институтдин издание патал кхьей макъалада къейднава.

Адан гафаралди, СССР чкIайдалай инихъ Пентагонди ядерный­ гьукуматдихъ галаз дявеяр арадал атунин мумкинвал фи­кирдиз гъанвачир, амма гила гьалар дегиш хьанва. США-дин оборо­надин ми­нистерстводи терроризмдихъ галаз женг чIугуниз къуватар­ серф­завайла, Россиядини Китайди гуя чапхунчивилин сиясат туху­ник­ кьил кутунва лугьуз, адмиралди бине авачир веревирдер раижнава­.

Къарабахда амукьна кIанзавач

ОДКБ-дин (Организация Договора о коллективной безопасности) генеральный секретарь С. Заса Дагълух Къарабахда авай Сириядай тир гьакъидихъ кьунвай аскерриз элкъвена хъфинин патахъай эвер гана, раижзава “Новости” РИА-ди.

Адан гафаралди, гьакъидихъ кьунвай аскерар къалмакъал авай зонадай эхкъечIун герек я. “ОДКБ-дин членрин-уьлквейрин часпаррин патарив боевикрин кIеретIар, къанунсуз кьушунар арадал­ атун — ибур чи умуми хатасузвал къурхудик кутун мумкин тир гьерекатар я”, — лагьана генсекди.

Гаф гана

Россиядинни Аргентинадин президентар — В. Путин ва А. Фернандес — телефондай рахай чIавуз чи уьлкведин регьберди атIадаз Россиядиз атун теклифна.

“Новости” РИА-ди хабар гузвайвал, Фернандеса уьлквейрин арада сада муькуьдаз хийир гудай алакъаяр хьун кар алай месэлайрикай яз гьисабзава. Къейдзавайвал, уьлквейрин регьберар 30 декьикьада рахана. Абуру са жерге месэлаяр, гьа жергедай яз тIугъвалдихъ галаз алакъалу гьаларни веревирдна. Фернандеса Россиядиз атун хиве кьуна. Идалайни гъейри, ада “Спутник V” вакцина агакьарунай В.Путиназ чухсагъул малумарна.

Интернетда къадагъаяр

Россияда 1-февралдилай соцсетар къанунсуз малуматар жагъуруниз ва агалуниз мажбурзавай законопроект кардик акатнава. Соцсетра эдебсуз келимаярни къадагъадик акатнава. Идан гьакъиндай Госдумадин сайтди хабар гузва.

ЦIийи къанундал асаслу яз, суткада Россиядай тир 500 агъзур­далай гзаф ксар гьахьзавай соцсетар чпин контентдал гуьзчивал тухуниз мажбур жезва. Гьукумдин органриз, уьлквейрин яржариз акси къейдер-малуматар ва чалпачухвилериз, экстремиствилиз, къадагъалу серенжемра иштиракуниз эвер гузвай информацияр чIурун гила соцсетрин хиве гьатнава. Соцсетрин сиягь Роскомнадзорди кьиле тухуда.

Арза ракъурнава

Дагълух Къарабахдин къалмакъал себеб яз Эрменистандин гьукуматди ЕСПЧ-диз (инсанрин ихтияррин гьакъиндай Европадин­ суд) Азербайжандин кьиле авайбуруз акси яз межгосударственный­ шикаят ракъурнава. Идакай “Sputnik Армения” чешмеди хабар гузва.­

Чешмедин делилралди, Дагълух Къарабахдин агьалийрин их­тиярар чIурунихъ галаз алакъалу яз, дяве куьтягь хьайидалай кьу­­­лухъ­ республикадин гьукумдарри сифте яз ихьтин арза ракъур­на­ва­.

9-ноябрдиз Дагълух Къарабахда тамамвилелди цIаяр-дявеяр акъвазарунин гьакъиндай Россияди, Азербайжанди ва Эрменистанди пуд терефдин икьрардал къулар чIугунай.

Носорогди кукIварна

Индиядин Ассам штатда, милли Казиранга паркуна тамун майи­шатдин департаментдин къуллугъчи носорогди гьужумуникди кьена. Идакай “Hindustan Times” изданиди хабар гузва.

Милли паркунин директордин гафаралди, тамун къуллугъчидиз ажугълу носорогди еке азабар гана, кукIварна. Тадиз азархана­див агакьарнатIани, кьиникьикай къутармишдай мумкинвал амачир­.

Къейдзавайвал, Казиранга са карч алай носорогар гзаф яшамиш жезвай чка я. Идалай вилик ЮАР-да бегемотди вичихъ гелкъвезвай иеси кукIварнай.

«Лезги газет»