И йикъара Дагъустандин Кьилин ва Гьукуматдин Администрацияда гуьгьуьллудаказ коронавирусдин садакай масадак акатдай азардиз акси рапар ягъуниз талукь серенжемдин сад лагьай пай кьиле фена. 100-лай виниз ксари, гьа гьисабдай яз республикадин исполнительный властдин органрин регьберрини, COVID-19 азардиз акси рапар ягъунин хушвал авайди къалурна. Абуру и кар кьилиз акъудун патал виликамаз ивидик антитела кватIа чирзавай анализ (тестирование) вахканвай. Адан нетижайрал асаслу яз, 30 касдиз рапар ядай мумкинвал гана. Идакай чи редакциядиз РД-дин Кьилин ва Гьукуматдин Администрациядин пресс-къуллугъдай хабар гана.
И юкъуз коронавирусдиз акси рапар ягъайбурун жергеда РД-дин Кьилин ва Гьукуматдин Администрациядин регьбердин заместитель Арслан Сайпуллаев, ина кардик квай жуьреба-жуьре управленийрин ва отделрин векилар, гьакIни РД-дин архитектурадин ва градостроительстводин рекьяй Комитетдин председатель Незир Гьуьсейнов, РД-дин Кьилин патав гвай аялрин ихтияррин рекьяй Уполномоченный Марина Ежова ва масабур авай.
“За медицинадин рекьяй чи къуллугъчийриз ва вакцина арадал гъанвай ксариз ихтибарзава ва гьавиляй раб ягъун кьетIна. И кар за жув ва жуван багърияр хуьн патал кьилиз акъудзава”, — къейдна республикадин кьилин архитекторди раб ядайла.
Вичи раб ядай къарар гьикI кьабулнатIа, Марина Ежовадини лагьана: “Са шумуд асир идалай вилик ЧIехи Екатеринади цIегьериз акси раб ахтармишун патал ам сифтени-сифте вичиз янай. Идалди ада азардиз акси раб, сад лагьайди, тIегъуьн акъвазардай тек са такьат тирди, кьвед лагьайди, адан хатасузвал, пуд лагьайдини, ихьтин раб (вакцина) арадал гъун илим вилик фин тирди къалурнай. Исятда, XXI асирда, азардиз акси раб тIугъвал акъвазардай тек са такьат тирдан жигьетдай шаклу хьун дуьз туш”.
Дагъустандин Кьилин ва Гьукуматдин Администрацияда коронавирусдиз акси рапар ягъун давам жеда. Мукьвара лазим тестирование кьиле тухвайдалай кьулухъ абур ашкъи авай маса къуллугъчийризни ядайвал я.
Январдиз Махачкъалада алай аямдин вири истемишунриз жаваб гузвай холодовой центр ахъайнаа, аниз районризни шегьерриз вакцина ракъурун патал холодильный камераярни галай махсус автотранспорт маса къачуна.
Чи мухбир
