Мукьвара “Лезги газетдин” редакциядиз Ярагъ Мегьамедан тIварунихъ галай мергьяматлувилин фондунин председатель Гьажибуба Рустамовалай чар атана. Чна ам газет кIелзавайбурун фикирдиз гъизва:
“Гьуьрметлу Мегьамед Ибрагьимович!
Алатай йисан эхирра “Дагъустан” РГВК каналдай эфирдиз акъатай “Вахтар ва инсанар” передачайрикай сад “Лезги газетдин” 100 йис тамам хьуниз талукьарнавайди тир. Ана хайи чIалал акъатзавай газетдихъ авай агалкьунрихъ галаз санал, кIвалахдин рекье гьалтзавай четинвилерикайни лагьанвай. Мисал яз, редакцияда зегьмет чIугвазвайбурун зегьметдин гьакъи гъвечIиди хьун, жегьил пешекаррин кьитвал, ДГУ-дин, ДГПУ-дин филологиядин факультетрин урус ва Дагъустандин чIаларин отделенийрик лезгийрикай лап тIимилбур экечIун ва икI мад.
Гьелбетда, республикадин милли газетдин редакцияда кIвалахзавай мухбирдиз къвезвай 15 агъзур манатдихъ кьил хуьз, вични шегьердин чкада, четин я.
И кар фикирда кьуна, за лезги чIал вилик тухудай мергьяматлувилин махсус фонд арадал гъун теклифзава. Адан куьмекдалди, месела, лезги чIалал машгъул жезвай алимриз, дидед чIалан тарсар гузвай муаллимриз, милли изданийрин мухбирриз пулдин жигьетдай куьмекар гуда, ктабар акъудда, гьар жуьредин мярекатар тешкилда ва санлай чIал хуьн ва вилик тухун патал маса серенжемар кьабулда.
Гьелбетда, фонд арадал гъун регьят кар туш. Амма и кардик вири халкьди къуьн кутуртIа, арадал нетижани къведа. Эгер вацра 25 агъзурдалай виниз къазанжи къвезвай гьар са лезгиди хайи чIал вилик тухун патал кардик кутадай фондуниз гьар вацра 100 манат чара ийиз хьайитIа, и месэладал кIукI къведа. Гьелбетда, фондунихъ устав, председатель, совет, банкдин счет хьун герек я.
Зи теклиф веревирд авун патал лезги районрин, РД-дин Халкьдин Собранидин ва РФ-дин Госдумадин депутатрин, жемиятдин, илимдин, медениятдин векилрин, хайи чIалахъ рикI кузвай ватанэгьлийрин иштираквал аваз милли собрание тешкилайтIа, хъсан жеда.
Эгер чалай и макьсад кьилиз акъудиз алакьайтIа, милли изданийра кIвалахзавай мухбирдиз вацра къвезвай мажиб артухариз жеда (мисал яз, 30 агъзур манатдал кьван). Хайи чIал чирзавай, ахтармишзавай студентриз, аспирантриз алава стипендияр тайинарда. И карди хайи чIал чирун патал вузрик экечIзавай жегьилрин кьадарни артух хьуниз таъсирда. Лезги чIалан муаллимриз пулдин рекьяй куьмекар гуда. Винидихъ лагьайвал, ктабар акъудда, хайи чIал хуьдай ва вилик тухудай проектар гъиле кьада.
Са кардив эгечIдайла четинвилер ацалтун адетдин гьерекат я. За фикирзавайвал, чна къуватар сад авуртIа, Аллагьдин куьмекдалди, фонд арадал гъунин месэла кьилиз акъудиз жеда”.
Редакциядин патай:
Гьуьрметлу агъсакъал Гьажибуба Рустамова къарагъарнавай месэла, гьакъикъатдани, чи халкьдин тIал алай месэлайрикай сад я. Эхиримжи йисара гьатта хуьруьн чкайрани кваз хайи чIал туна, урусдал рахазвайбур пара, мектебра дидед чIалан тарсар гузвай муаллимрин, газетрин, журналрин редакцийра кIвалахзавай пешекаррин кьадар тIимил жезва. ЧIал вилик финиз манийвилер гузвай крарин, гьерекатрин, месэлайрин сиягь мадни давамариз жеда…
Лагьана кIанда, чи къунши миллет тир табасаранрихъ хайи чIал хуьнин ва вилик тухунин жигьетдай махсус фонд ава. Адан кIвалахдикай чахъ гегьенш малуматар авач, амма ахьтин фонд авайдакай чун хабардар я. Лезгийривайни ихьтин фонд тешкилайтIа жеда. Гьажибуба Рустамова къейд авурвал, Аллагьдин куьмекдалди, вири халкь сад хьана, и месэла кьилиз акъудизни жеда. И карда чунни чалай алакьдай куьмекар гуз гьазур я.
«Лезги газет»
