Алай йисан январдин вацран юкьвара Германияда, “Books on Demand” чапханада, немс чIалал “Лезги гьикаят” тIвар алай надир ктаб акъатнава. Ам гьазурайди Штеффи Хотивари-Юнгер я.
Ктабда алай аямдин машгьур ирид лезги писателдин гьикаяярни миниатюраяр гьатнава. Авторрин арада Дагъустандин халкьдин писатель Абдуселим Исмаилов, Дагъустандин халкьдин шаир Арбен Къардаш, Пакизат Фатуллаева, Фейзудин Нагъиев, Седакъет Керимова, Фазир Жаферов ва Вадим Керамов ава. Икьван чIавалди абурукай садан эсерарни немс чIалал чапдай акъатнавачир.
“Лезги гьикаят” ктабди немс чIалал кIелзавайбур лезги халкьдин яшайишдихъ, медениятдихъ, адетрихъ галаз танишарзава, дагъвийрин къилихдин кьетIенвилерикай хабар гузва, жемиятдин уьмуьрда кьиле физвай дегишвилерикай, вакъиайрикай суьгьбетзава.
Чна чи къелемдин дустариз ихьтин ктаб чапдай акъатун рикIин сидкьидай мубаракзава ва абурухъ яратмишунрин рекье мадни еке агалкьунар хьана кIанзава.
Агьмед Магьмудов
