И йикъара Дондал алай Ростов шегьерда грекринни римлуйрин жуьреда кьуршахар кьунай Россиядин чемпионат кьиле фена. Нетижада заланвилин 10 категориядай гъалибчияр раиж хьана. Олимпиададин къугъунрин вилик эхиримжибур тирвиляй и акъажунрихъ мадни еке кесерлувал, важиблувал авай…
Акъажунра 60 кг-дал къведалди заланвал авайбурун арада гьасиррал чпин устадвал къалурай спортсменрин арада Москвадин областдин патай экъечIнавай чи ватанэгьли, вичин ери-бине Ахцегь райондай тир Анвар Аллагьяровни авай. Вичихъ галаз бягьсиниз экъечIай пуд касдал (Арут Саркисян — Краснодардин крайдай, Андрей Иванов — Мордовиядай, Ильясхан Исламов — Дагъустандай) гъалибвал къазанмишуналди, чи ватандаш ярумчух финалдиз акъатна. Ина ада дуьньядин, Европадин ва Европадин къугъунрин кьве сеферда чемпион Степан Марянянахъ (Краснодардин край) галаз вичин къуватар ахтармишун лазим тир. Эхирдалди С.Марянянавай бягьсиниз дурум гуз хьанач, Анвар Аллагьярова 5:3 гьисабдалди гъалибвал къазанмишна. Амма финалдин бягьсина чи ватандаш Мордовиядай тир Сергей Емелиназ кумукьна, ам гимишдин медалдиз лайихлу хьана.
РикIел хкин: 2019-йисан июлдиз Испаниядин Понтеведра шегьерда кьиле фейи Европадин кIвенкIвечивал патал акъажунрани А.Аллагьярова 2-чка кьунай. Гьа и йисуз Эстониядин меркез Таллинда хьайи дуьньядин кIвенкIвечивал патал акъажунра (финалда ам Азербайжандин патай экъечIнавай Заур Алиевахъ галаз “гуьруьшмиш хьанай”) 55 кг-дин заланвал авайбурун арада инанмишвилелди гъалибвал къазанмишуналди, Анвар Аллагьяров къизилдин медалдиз лайихлу хьанай. 2020-йисуз Владимир шегьерда кьиле фейи Россиядин чемпионатда (21 йисал къведалди яшда авайбурун арада) чи ватандашди 1-чка кьунай.
Рагнеда Рамалданова
