За “Лезги газетдин” алай йисан 3-нумрадиз акъатнавай кьилин редактор­ Мегьамед Ибрагьимован “Тарих гъиляй акъатзава” макъала дикъетдив­ди кIелна. Ана ихтилат Кьурагь райондин Кьуьчхуьррин хуьревай Да­гъус­тан­дин мулкарал виридалайни къадимбурукай сад яз гьисабзавай мис­кIин­дикай физва. Зазни а хуьр, харапIайриз элкъвенвай маса хуьрер, чкIанвай мис­кIи­нар хьиз, гьайиф къвезва. Амма гьайиф атуналди са карни туькIуьз­вачирди ви­ридаз хъсандиз чизва.

Кьуьчхуьррин хуьр неинки са Абумуслиман девирдин сур мис­кIиндал, гьакI­ни хандин хура акъвазай чIехи шаир Саидал, камаллу агьалийрал, зегь­мет кIани инсанрал, гегьенш дагълар ацIай суьруьйрал, гуьзел тIебиат­­дал­ машгьур хуьрерикай сад яз чида. Заз са шумуд сеферда и хуьруьз атун кьисмет хьана.

Кьуьчхуьррин хуьруьн куьчейра гатуз фитедин гъиляй къекъвез жеда­чир. Советрин девирда хкажай пямятникар, гьа девирдиз хас лозунгар (ми­сал яз, цларал аламай сечкийра иштиракуниз эвер гузвай кхьинар), етим хьанвай харапIаяр Япониядал вегьей атомдин бомбаяр галукьайбур хьиз аквазвай…

Сифте яз зун и хуьруьз Кьуьчхуьр Саидан юбилейдиз талукьарнавай мярекат авай чIавуз акъатнай. Кьвед лагьай гъилера аниз зун жегьил шаир, таржумачи Мурад Саидахъ галаз фенай. А чIавуз чахъ галаз иниз кьве хизанни атанай. Чун харапIайрин арайра къекъвена, къайи булахрин ятар хъвана. Гьатта ина гьайванар хуьзвай чубанрихъ галаз санал шуьшеяр ханвай дараматда, къайи гарал, са йифни акъуднай.

Гьакъикъатдани, Мегьамед Ибрагьимова къейдзавайвал, тарих гъиляй­ акъатзава. МискIиндихъ галаз санал тамам са хуьр терг жезва. Ашукь Саи­да жемятдин вилик ялавлу манияр ла­гьай, шиирар кIелай кимел алай кIарасни ктIан­ва, куьчеяр ичIи хьанва, дараматар харапIайриз элкъ­вен­ва…­

Чна и кардин — хуьрер харапIайриз элкъуьнин вилик пад кьуна кIанда. Куьгьне хуьрер хуьн чакай гьар садан буржи я. Сифте нубатда, касни ама­­чир хуьрериз хъфизвай рекьер къайдадик кухтун герек я. Гьич тахьай­тIа, йиса садра кьванни хуьрериз хъфин, бубайрин сурарал кьил чIу­гун ла­зим я. Хуьрерин йикъар къейд ийидай кьилдин суварар тешкилайтIа, мадни хъсан я. Идалайни гъейри, чкIанвай хуьрерин жемятри, къуватар садна, хуьрерал чан хкуникай фикирна кIанда. И месэлаярни рес­пуб­лика­дин, районрин кьилевайбурухъ галаз меслятна, тайин программаяр, про­ек­тар арадал гъана, кьилиз акъудиз жеда. Зи фикирдалди, тежедай са карни авайди туш, эгер халис тешкилатчияр хьайитIа. Абурни чахъ авачиз туш.

Сажидин Саидгьасанов