Алай йисан 22-январдиз Дагъустандин Гьукуматда Дербент шегьердилай къерехдай тухузвай рекьиз талукьарнавай совещание кьиле фена. И рехъ эцигунихъ гьам шегьер, гьамни центральный шегьре рехъ автотранспортдикай кьери авунин жигьетдай еке метлеб ава.
ЦIийи рекьин куьмекдалди Дербентдиз гьахьзавай чка Набережный куьчедихъ, “Карьер” ва “Аэропорт” микрорайонрихъ галаз алакъалу ийида. Идан гьакъиндай чи редакциядиз республикадин Кьилин ва Гьукуматдин Администрациядин пресс-къуллугъди хабар гана.
Шегьердин къерехдай тухузвай рехъ 2017-йисуз эцигиз гъиле кьунай. Амма 2018-йисан майдиз эцигунрин кIвалахар акъвазарна. Идан себебни рекьик акатзавай чилин участокар пулдихъ вахчуна государстводин хсусиятдиз элкъуьр тавун тир.
РД-дин транспортдин ва рекьерин майишатдин министрдин къуллугъ вахтуналди тамамарзавай Ширухан Гьажимурадова къейд авурвал, алай вахтунда гьа чилин участокар вахчуниз талукь серенжемар кьиле тухузва ва икьрарар кутIунунин месэла гьялзава.
РД-дин Премьер-министр Абдулпатагь Амирханова и серенжемар тади гьалда кьилиз акъудунин тапшуругъ гана.
«Лезги газет»
