Са шумуд югъ идалай вилик Москвадин областдин Истринский районда “Moskow Open — 2021” лишандик кваз кикбоксингдай (К-1, “фулл-контакт”, “поинтфайтинг”, “лайт-контакт”, “жёсткий стиль с предметом”, “жёсткий стиль” жуьрейрай) Вирироссиядин акъажунар кьиле фена. 

Турнирда Россиядин саки вири регионрай тир 1500-далай виниз спортсменри чпин устадвал къалурна. Абурун жергеда вичин ери-бине Сулейман-Стальский райондин Сийидрин хуьряй тир ва алай вахтунда Сургутда яшамиш жезвай  Мигрет  Мегьамедовни  (94 кг-дилай гзаф заланвал) авай. Олимпиададин къугъунрин къайдада кьиле тухузвай и акъажунра ада къизилдин медаль къазанмишна.

Малум хьайивал, им чи ватанэгьлидин сифтегьан агалкьун туш. Ада ХМАО-Юградин кIвенкIвечивал (2018, 2019-йисар), Россиядин кIвенкIвечивал (2018-йисуз Москвада, 2019-йисузни Самарада) патал акъажунра 2-чкаяр кьуна, ам Россиядин Кубокдин (2019-йис, Крымдин Алушта шегьерда) сагьиб я.

Рагнеда Рамалданова