Играми газет кIелзавайбур! Алай йисан январдин вацралай Ахцегьрин хуьре “Дагпечатдин” киоск кардик акатнава. Ам Дагъустандин халкьдин шаир Хуьруьг Тагьиран тIварунихъ галай паркуна эцигнава.
Алай вахтунда киоскар Кьиблепатан Дагъустанда Ахцегьрилай гъейри, Белижда, Мегьарамдхуьре ва Кьасумхуьрел ала.
Киоскар, сифте нубатда, жуьреба-жуьре газетар, журналар кхьидайла агьалийриз пулдал гьалтайла кьезил хьуй лагьана кардик кутунва. Мисал яз, 2021-йис патал “Лезги газет” кхьинин къимет почтадин алакъадин отделенийрай — 977, киоскрай — 456 манат тир. Алай йисан кьвед лагьай пай патал Ахцегь райондин агьалийривай киоскдай “Лезги газет” 228 манатдихъ кхьиз жеда.
Киоскди ислен ва киш йикъара экуьнин сятдин 9-далай нисинин 12-далди, саласа, арбе, хемис, жуьмя йикъара экуьнин сятдин 9-далай нянин 6-далди кIвалахзава. Гьяд ял ядай югъ я. “Лезги газетдин” цIийи нумра киоскдив гьар гьафтедин жуьмядиз агакьзава.
Агьмед Магьмудов
