Алатай киш юкъуз чав пашман хабар агакьна: писатель, журналист Мегьамед Ведихов (Мегьамед Ведих) 65 йисан яшда аваз рагьметдиз фена. М.Ведихов 1956-йисуз Хив райондин КьванцIилрин хуьре дидедиз хьана. Ада, 1974-йисуз хайи хуьруьн юкьван школа куьтягьайла, БАМ-дал ва маса карханайра фяле, устIар яз зегьмет чIугуна.
Мектебда кIелзавай йисарилай руьгь яратмишунин кардихъ ханвай жегьил 1982-йисуз Москвада литературный институтдик экечIна ва анаг ада агалкьунралди куьтягьна. Ана Феликс Кузнецован гъилик прозадай семинарра иштиракна. Республикадин “Коммунист” газетда корреспондентвиле кIвалахал акъвазай М.Ведихова цIуд йисалай виниз Кьиблепатан Дагъустандин экономикадиз, промышленностдиз, хуьруьн майишатдиз талукь кар алай месэлаяр къарагъарна, метлеблу макъалаяр, баркаллу зегьметчийрикай очеркар, зарисовкаяр кхьена.
Мегьамед Ведихова лезги эдебиятдин гьикаят вилик тухуник вичин пай кутуна ва прозада жанлу гел туна. Хсуси ва кьетIен хатI авай писателдин къелемдикай “Абас”, “ЧIулавди” повестар, “Гьарасатдин майдандал” роман, хейлин гьикаяяр, очеркар хкатна. Абур “Бахтлу хьухь, кIвал”, “Кьуьд” ктабра гьатнава. Уьлкведа ва чи хуьрера кьиле фейи гьерекатрикай, инсанрин кьисметрикай, уьмуьрдив эгечIзавай тегьердикай кхьенвай эсерар кIелзавайдаз таъсирдайбур, фикирар ийиз тадайбур я.
Уьлкведа дегишвилер арадал атайла, вири сад-садак какахьай четин вахтунда Мегьамед Ведихов хуьруьз хъфена ва ада барбатI жезвай колхоздин кьил кьуна. Ахпа хуьруьн юкьван школада аялриз дидед чIалан ва литературадин тарсар гана. Са кьадар вахтунда ам Дербент шегьерда яшамиш хьана.
Чна рагьметлудан хизанриз, мукьвабуруз, писатель чидай вирибуруз башсагълугъвал гузва. Ада тунвай ирс эбеди яз амукьда.
“Лезги газетдин” редакциядин коллектив
