Чи ватанэгьлияр — гьар сана
Хайи чиливай яргъариз акъатнавай, анра пешедин рекьяй кIвалахрив эгечIнавай жегьил векилрикай ихтилат кватайла, бязибуру ихьтин суални гуда: жуван ватанда ватанэгьлийриз къуллугъ тавуна, вучиз патарал физва? Гьелбетда, гьар са кьилдин дуьшуьшдихъ вичин себебарни ава. Умумиламишна лагьайтIа, себебрик ихьтин месэлаяр акатзава: образование къачур пешекардиз чкадал кIвалах жагъун тавун, виликди фидай мумкинвилер ва авай гьалар-шартIар бегенмиш тахьун, мажибрин кьадарар тIимил яз акун ва икI мад. Ахпани, “кьисмет” лугьудай шейни ава эхир. ЧIехи шегьерра, гегьенш мумкинвилер авай чкайра тежриба ва чирвилер къачуна, гуьгъуьнлай чпин зегьметдин рехъ ватанда давамар хъийизвай пешекарарни ава.
Кьилинди, гьина аватIани, инсанвал, гьакъисагъвал, пешедиз вафалувал къалурун рикIелай алудна кIандач. Ихьтин ерияр хас жегьилар чахъ тIимил авач. Уьлкведин меркезда духтур-оториноларинголог яз кIвалахзавай Руслан Валерикович Мегьамедовни гьахьтинбурукай сад я. КIвалахдив эгечIай сифте йикъарилай ада чешнелувал, вини дережайрихъ майиллувал къалурзава.
Р.Мегьамедов 1994-йисан 7-июндиз Сулейман-Стальский райондин Кьулан СтIалрин хуьре дидедиз хьана. Хуьре юкьван мектеб куьтягьна, 2011-йисуз А.С.Бубнован тIварунихъ галай Иваново шегьердин гьукуматдин медицинадин академиядик экечIна ва 2017-йисуз анаг куьтягьна. Гуьгъуьнлай ина “духтур-оториноларинголог” пешедай ординатурада кIелун давамарна.
Зегьметдин рехъ 2017-йисуз Иваново шегьерда областдин клиникадин азарханада духтур-оториноларинголог яз кIвалахунилай башламишна. 2019-2020-йисара ада Москва шегьердин 6-нумрадин поликлиникада пешедин рекьяй кIвалах давамарна.
Алай вахтунда Руслана “Международный центр охраны здоровья” клиникада кIвалахзава. Ам медицинадин рекьяй дериндай ахтармишунар-килигунар тухудайбурун комиссиядик ква.
Клиникада адан кьилин везифайрик спортсменар сагъарунин ва реабилитациядин план туькIуьрун, абурун сагъламвилин гьал ахтармишун акатзава.
Кьилди къачуртIа, азарханада машгьур футболистар ва маса спортсменар сагъар хъийизва. Абурун жергедик “ЦСКА”, “Динамо”, “Арсенал” футболдин клубрин футболистар акатзава.
Лор-азаррин диагностикадин цIийи къайдайрин, абур сагъарунин рекьяй Руслан духтурдихъ кьетIен тежриба ва алакьунар ава. Адаз гележегда медицинадин илимдал машгъул жедай, аспирантурадик экечIдай ва Дагъустандиз куьч хъхьана, ватанэгьлийриз медицинадин рекьяй къуллугъдай къастар ава.
Москвада кIвалахзаватIани, ада ватанэгьлийриз, танишриз вичин пешедин рекьяй куьмекар, гьатта медицинадин маса пешейрай куьмекар кIанзавайбурузни хъсан меслятар гузва, гьиниз ва нин патав ракъурдатIа, лугьузва. Вичелай алакьдай куьмекар гун ада виридалайни лайихлу кар яз гьисабзава.
Чазни ам вичин мурадривни макьсадрив агакьна кIанзава.
К. Ферзалиев
