Куь ихтиярар
Алай йисан январдилай уьлкведа бязи цIийи къанунар, дегишвилер къуватда гьатнава. Абурукай са бязи делилар республикадин МФЦ-дин идарайрини халкьдиз раижнава.
НДФЛ
Йисан муддатда 5 миллиондилай артух къазанжи къачузвайбур патал 15 процент НДФЛ (налог на доходы физических лиц) тайинарзава. И жигьетдай Госдумадин Председатель В.Володина малумарнавайвал, артухарнавай налогдин такьатар залан азарар квай аялар сагъаруниз серфда.
Зегьметдин кодексда
Зегьметдин кодексда дистанционный саягъда кIвалахуниз талукь дегишвилерни къуватда гьатда. Къанундин дегишвилерал асаслу яз, къуллугъчи вичин кIвалах махсус идарада ваъ, яргъа (месела, кIвале) тамамарунин къайдадал алуддайла, адан мажибдин кьадар агъузардач.
Теклифнавай заминвилери къуллугъчидин зегьметдин ихтиярар хуьн лазим тирди тестикьарнава.
Хуьруьн ипотека
ЦIи хуьруьн ипотекадин мумкинвилерни гегьеншардайвал я. Кьилди къачуртIа, гила кирида кьунвай чилел эцигунар ийиз кIанзавай ксаривайни хуьруьн ипотекадикай менфят къачуз жеда.
Хуьруьн ипотека — им чилин участок къачун ва анал кIвал эцигун патал кьезиларна (процентдин кьадар йиса 0,1-далай 3-дал кьван) тайинарнавай кредит я. ТIвар кьунвай ипотекадикай хуьруьн чкада ва я 30 агъзурдалай гзаф ксар яшамиш тежезвай шегьерда чилериз ва кIвалериз талукь яз менфят къачудай мумкинвал ава.
“Акьуллу” счетчикар
Ишлемишиз вахканвай гзаф мертебайрикай ибарат кIвалер электричестводин энергиядин гьахъ-гьисабар тухудай “акьуллу”приборралди тадаракламиш хьун чарасуз я. Ишлемишнавай электричестводин делилар кхьена ракъурунин лазимвал амукьзавач, абур “акьуллу” счетчикди вичи агакьарда тешкилатдив.
«Лезги газет»
