Алатай йисан эхиримжи йикъара Мегьарамдхуьруьн райондин нубатдин школадив аялар санай масаниз тухун патал герек цIийи “Газель” микроавтобус агакьна. КьепIир-Къазмайрин юкьван мектебда кIелзавай аялри школадин ихтиярда вуганвай алай аямдин ва хатасуз улакь чпиз ЦIийи йисан суварин вилик авунвай халисан савкьат яз кьабулнава ва и кардал иллаки разивалзава, къейдзава муниципалитетдин информациядин центради.
РикIел хкин, 2020-йисан сифте кьиляй райондин умуми образованидин пуд тешкилатдиз — Чепелрин, Гарагърин ва Ярагъ-Къазмайрин школайриз цIийи улакьар ганай. Идалай вилик квай йисара райондив 8 машин агакьнай. Райондин кьил Фарид Агьмедован гафаралди, 2017-2020-йисарин вахтунда муниципалитетдин мектебрин улакьрин парк махсус транспортдин 12 машиндалди цIийи хъувунва. Фарид Агьмедова къейдзавайвал, мектебра кIелзавай аялар ва муаллимар патал къулай шартIар тешкилун образованидин къурулушдин кар алай месэлайрикай сад я.
«Лезги газет»
