Алукьнавай 2021-йис, РД-дин Кьилин везифаяр вахтуналди тамамарзавай Сергей Меликован къарардалди, Советрин Социализмдин Дагъустандин Автономиядин Республика (ДАССР) арадал атайдалай кьулухъ 100 йис тамам хьунин юбилейдинди яз малумарнава. Республикадин гзаф асиррин тарихда и вакъиадин важиблувал зурбади я — 1921-йисан январдиз республикадин халкьар государстводин сад тир тешкилат — автономия яз тупламишун хьанай. Россиядихъ галаз са-са уьлкведин сергьятра аваз, гьа са вахтунда кьилдин республика яз гележегдихъди финин къарар дагъустанвийри чпин хушуналди кьабулнай. Тарихдин вакъиаяр рикIел хуьн ва акьалтзавай несил ватанпересвилин руьгьдаллаз тербияламишун — алай йисуз и месэлайрал кьетIен фикир желбдай къарар кьабулнава.
Гьаниз килигна, «Лезги газетдини», адет хьанвайвал, винидихъ лагьанвай месэлайриз талукь конкурс малумарзава. Пуд чкадикай ибарат тир и конкурсдин премийрин кьадар виликдай хьиз амукьда: 3000 манат — виридалайни хъсан очеркдай, 2000 манат — публицистикадин макъаладай ва 1000 манат — лап хъсан шиирдай. Текстинин кьадар 4 чарчелай артух ва шииррин кьадар 5 бендинилай тIимил тахьун лазим я.
Алатай йисара хьиз, чна юмординни сатирадин куьруь жанрайрин “ИкIни жеда кьван” ва уьмуьрдин рехнеяр арадай акъудиз куьмек гузвай “Хъсан шикил” конкурсарни давамарзава. И конкурсра гъалиб хьайибуруз гьардаз 1000 манат премия ва дипломар гуда.
“Гьевесламишдай премия” — 1000 манат ва диплом — са шумуд касдивай къачуз жеда. И кар патал хайи газетдин чинал жуьреба-жуьре хци месэлайрай кьил-кьилел алай макъалаяр гъана кIанда.
Идалайни гъейри, литературадихъ, чIалан къешенгвилихъ галаз алакъалу жаванрин ва жегьилрин арада бажарагълубур хкягъунин мураддалди малумарнавай пуд премияни къуватда ама.
Сад лагьайди — виридалайни хъсан гьикаядин эсер (кьадар вини кьил пуд чарчелай артух тушиз, А4 форматдин чар, 14 кегль, 1,5 интервал). И конкурсда чпин яшар 35 йисалай виниз туширбурувай иштиракиз жеда.
Кьвед лагьайди — Дагъустандин вузрани колледжра кIелзавай лезги студентрин арада “Виридалайни хъсан очерк” кхьинай (кьадар вини кьил пуд чарчелай артух тушиз, А4 форматдин чар, 14 кегль, 1,5 интервал). Тема ачухди я.
Пуд лагьайди — мектебра кIелзавай аялрин арада “Виридалайни хъсан шиир”кхьинай. Тема ачухди я.
Конкурсрин гъалибчийрин агалкьунар пулдин премийралди (1-чка — 3000 манат, 2-чка — 2000 манат ва 3-чка — 1000 манат) ва «Лезги газетдин»дипломралди лишанламишда.
Алай йисуз чна мад са конкурс — “Йисан мухбир” — малумарзава. Премия — 3000 манат. “Лезги газетдихъ” галаз алакъаяр хуьзвай ватанэгьлияр патал им лап хъсан мумкинвал я, гьикI лагьайтIа, макъалайрин я темаяр, я жанрияр сергьятламишнавач. Газетдин редакциядиз мукьвал-мукьвал макъалаяр рекье тун, халкьдин тIал алай месэлаяр къарагъарун герек я.
РикIел хкин: конкурсдиз ракъурзавай макъалаяр басма авунвай кьуд чарчелай чIехибур хьун лазим туш. Макъалайрин кьилел гьи конкурс фикирда кьуна кхьенвай макъала ятIа, къейд авун чарасуз я! Конкурсдин шартIариз жаваб тагузвай эсерар гьисаба кьадач.
Конкурсриз рекье твазвай материалар редакциядин адресдиз (Махачкъала, Насрутдинован тIварунихъ галай проспект, 1 «А», 7-мертеба. «Лезги газетдин» редакция) ва я чи электронный адресдиз lezgigazet@yandex.ru ракъуриз жеда.
Гьуьрметлу чи ватанэгьлияр, амадагар! Квехъ алукьнавай йисуз анжах къени крар, хуш хабарар агакьрай ва пешеда агалкьунар хьурай. Чна куь макъалаяр гуьзлемишзава.
«Лезги газет»
