Алатай йисан эхирриз Махачкъалада аялар аварийрик акатунин вилик пад кьуниз талукь яз чирвилер ва тежриба (вердишвилер) гудай центр ачухна. Чна виликамазни хабар гайивал, вичин макьсад аялриз рекьерин гьерекатдин къайдаяр ва машинар авай чкайра чеб хатасуздаказ тухуз чирдай центрадиз яшар 5 йисалай артух хьанвайбур кьабулдайвал я. Ам РД-дин транспортдин ва рекьерин майишатдин министерстводин «Рекьерин гьерекат тешкилдай центрадин» теклифдалди Россиядин МВД-дин ГАИ-дин ва “Хаталувал галачир гьерекат” экспертрин центрадин куьмекни галаз ачухна. Центрадин кьетIенвал а кардикай ибарат я хьи, чпел «Лаборатория безопасности» кхьенвай ва чеб лазим тир вири тадаракралди таъмин тир автобусра (автогородок) аваз тренерривай санай масаниз регьятдаказ физ ва Дагъустандин гьатта виридалайни дагълух районрани аялар патал рекьерин къайдаяр чирдай тарсар кьиле тухуз жезва.
РикIел хкин: 2020-йисан ноябрдиз РД-дин Гьукуматди Дагъустандин транспортдинни рекьерин майишатдин министерстводин ва РД-дин ГИБДД-дин Управленидин теклифдалди “2015-2020-йисара рекьерин гьерекатдин хатасузвал” подпрограммадик дегишвилер кухтуналди, и центр тешкилун патал пулдин такьатар чара авунай.
Центр ачухуниз талукьарнавай мярекат аялрин иштираквални аваз гзаф итижлудаказ кьиле фена. Ана РД-дин транспортдин ва рекьерин майишатдин министерстводин Управленидин начальник Кь.Мегьамедова, и министерстводин рекьерин гьерекат тешкилдай центрадин (ЦОДД) регьбердин везифаяр тамамарзавай Къ.Гьамзатова, РД-да авай МВД-дин УГИБДД-дин отделдин начальник, полициядин подполковник Т.Герейханова, Дагъустан Республикада аялрин ихтияррин рекьяй Уполномоченный тир М.Ежовади, СМИ-дин векилри ва масабуруни иштиракна.
Мярекатдал сифте гаф рахай Кь.Мегьамедова лаборатория кардик кутунин месэла яргъалди тевгьена кьилиз акъудунай Дагъустандин Минтрансдин рекьерин гьерекат тешкилдай центрадин регьбер Къазиагьмед Гьамзатоваз сагърай лагьана. ИкI, республикадин шартIар, гьа гьисабдай яз дагълух районарни фикирда кьуналди, РД-дин Минтрансди Дагъустандин образованидин ва илимдин министерстводихъ галаз саналди 2021-йисуз цIийи лаборатория чирвилер гудай идарайриз рекье гьатуниз талукь яз график туькIуьрдайдини раижна.
Мярекатдал рахай амайбуруни центрадин важиблувал къейд авунихъ галаз сад хьиз, республикадин рекьера аялар аварийрик акатунин кьадар тIимиларун патал мадни еке кIвалах кьиле тухудайди раижна. Кьилди къачуртIа, ЦОДД-дин регьбер Къ.Гьамзатован гафарай малум хьайивал, 2023-йисалди Дагъустанда цIийи мад 3 центр кардик кутадайвал я.
ИкI, республикадин ГИБДД-дин официальный делилрал асаслу яз, Терлан Герейханова раиж авурвал, 2020-йисан январдилай ноябрдалди 16 йисал къведалди яшда авай аялрин иштираквал аваз Дагъустанда 160 ДТП арадал атана.
— Им, алатай йисарив гекъигайла, 20,8 процентдин тIимил ятIани, нетижаяр чпел разивал ийиз жедайбур туш. ГьикI хьи, абурун нетижада 16 аял телеф ва 184-дални хирер-кьацIар хьана. Чи везифа республикадин рекьера са аялни телеф, гьич са аялдални хер-кьацI тахьун я. Гьайиф хьи, гьелелиг чавай бедбахтвилин вири дуьшуьшрин вилик пад кьаз жезвач. Гьавиляй чна чи кIвалахдиз — и важиблу месэладиз — жезмай кьван мадни еке дикъет гана кIанзава, — алава хъувуна ада.
Мярекат аялриз цIийи лабораторияда экскурсия тешкилуналди акьалтIна.
Рагнеда Рамалданова
