Асул гьисабдай татугай, вири инсаният къарсурай вакъиайрив ацIай 2020-йисни тарихда гьат хъувуна. Фантастикадиз хас, садани гуьзет тавур эйбежер вакъиайри вирибурун рикIера гел туна. Арадал атай гьаларикай виликамаз лагьанайтIа, чIалахъ жедай ксар тахьун мумкин тир. Амма къенин алем рикIелни алачир затIар пайда жедайдаз элкъвенва. Инсанри датIана уяхвал квадар тавун, вири имтигьанриз дурум гун герек я. Вучиз лагьайтIа пакадин юкъуз илажсуз ва уламсуз гьалда гьат тавунин заминвал авач. Кьисметдин гирведин а пата куь гуьзетзаватIа малумсуз я.
Алатай йисан мартдилай эгечIна инсанрин сивера, басмадинни электронный СМИ-рин такьатра “коронавирус” гаф кими хьанач. Дуьньяда миллиондилай гзаф инсанар къирмишунилай гъейри, коронавирусдин тIугъвалди миллионралди инсанрин крарни тIачна. Инсанар сагъламвал хуьнин женгина ава. Адалайни гъейри, алатай йисан муддатда алемда хьайи цIайлахар, дявеяр, къалмакъалар, асивилерни аксивилер гьисабайтIа, абурухъ и кьил а кьил амукьдач…
Яшлу инсанар кIвале ацукьуниз, кIвалахдик квайбур кIвале кIвалахуниз мажбур хьана. КIвале кIвалахдай мумкинвал тежезвай дуьшуьшарни ава эхир. “Лезги газетдин” редакциядини гьахьтин регьят тушир шартIара кIвалахна. 2020-йис “Лезги газетдин” асирдин юбилейдинди тир. И лишанлу вакъиадиз талукь мярекатарни кьиле тухуз хьанач — коронавирус себеб яз. Алатай йисан эвел кьилера “Лезги газетдин” редакцияди аялар патал хайи чIалаз талукь кьелечI ктабар акъудун фикирдиз къачунай. Гьа кардални кIукI атанач — коронавирус себеб яз. Газетдин тиражни агъуз аватна — коронавирус себеб яз. Фикирдиз къачур бязи мярекатарни кьиле фенач, тешкилай мярекатарни “адетсуз” къайдадинбур хьана. Коронавирус себеб яз.
Амма са карни дуьз хьанач лугьуз, шел-хвал авун лазим жезвач. Кьилди къачуртIа, тIугъвал пайда жедалди вилик “Лезги газетди” гьар йисуз хайи чIалай тухузвай олимпиада алатай йисузни тухвана, 10-октябрдиз, лезги чIалан юкъуз, тешкилай международный умуми диктантдик “Лезги газетдини” пай кутуна, ам тIугъвалдин шартIара кьиле тухвана, са кьадарбуру онлайн саягъда диктант кхьена…
Шак алач, коронавирусди инсанриз гьа авай гьаларал, затIарал, мумкинвилерал рази хьунин, гьабурун къадир чир хьунин жигьетдай “тарсар” гана.
Малум тирвал, алатай йис гьамбардин кьифренди тир, цIийиди жунгавдинди я. Гьамбардин кьифни жунгав сад муькуьдаз ухшар тушир гьайванар я. Белки, цIинин йисни шазандаз ухшар авачирди, инсанар патал шадвилер, хъсанвилер гъидайди жен. Кьилинди, ислягь ва сагълам уьмуьр давамардай гьаларикай хьурай! Жунгавдин йисуз инсанрин крар тIач тахьурай!
К.Ферзалиев
