2020-йисуз чпин гьунарлу краралди, экономикада, культурада, спортда, къуллугъдин дережайра, масанрани къазанмишай цIийи агалкьунралди чи халкьдин тIвар сейли авур вири рухвайризни рушариз баркалла, аферин!
Гьар йисуз адет хьанвайвал, чна цIийи тIварарин сагьибриз, абур гьина аватIани, чи редакциядин коллективдин тIварунихъай тебрикарни саламар рекье твазва.
ТIварар чна алфавитдин къайда хвена гузва.
* * *
Алик Абдулгьамидоваз — журналистдиз, РФ-дин Гьукуматдин премиядин лауреатдиз:
Икьван адлу шабагьдиз
Акуна вун ажебдиз!
Мадни артух уьзягъдиз
Женг чIугу, дуст, метлеб дуьз.
* * *
Аликбер Аликбероваз — РАН-дин Востоковеденидин институтдин директордиз:
Машгьур хва чи Хъукьвай я —
Арифдаррин юкьвай я!
Гьикьван яргъал асирар,
Къенин югъ хьиз, мукьва я!
* * *
Альберт Эмиргъаеваз — “АрхитI” тIвар алай фирмадин сагьибдиз, меценатдиз:
Хуьре цIийи обелиск
Хкажнава — куьн килиг!
Чи бубайрин къаматрал
Чан хквезва чи вилик!
* * *
Ариф Керимоваз — ФЛНКА-дин президентдиз, уьтквем, таъсиблу крарин кьилиз:
ГьикI ийидач тарифар
Уьтквем хцин — Арифан!
Абад хьана кIанзавай
Хайи Лезги тайифа!
* * *
Арсен Рагьмановаз — десантникдиз, РФ- дин ВДВ-дин генералдиз:
АрхитIвияр — Арсенар
Чи руьгьдин я жуьгьенар.
МуьтIуьгъарда женгера
Гьалтай вири мескенар!
* * *
Бахтияр Магьмудоваз — РД-да Стратегиядин проектрин агентстводин гендиректордиз:
Проектар лап цIийи
Кардик кутаз уьтквем я!
ЦIурурна цай гьулдан хьиз,
Бине вичин мягькем я!
* * *
Бехет Магьмудоваз — лезги хиперин жинсер арадал хкизвай селекционердиз:
Гаф авай туш Хинериз,
Кьакьанбур я чинериз!
Къалин чIарчIин суьруьяр
Хкизва чи синериз!
* * *
Даурен Куругълиеваз — азаддиз кьуршахар кьунай дуьньядин Кубокдин сагьибдиз:
МуьтIуьгъ тежер гьасир ваз
Такурай и дуьньядал!
Азадди я чи аваз,
Ашукьди шад гьавадал!
* * *
Духтурриз — тIугъвалдив женг чIугвазвай Игитриз:
Инад хьурай тIугъвалдиз,
Кутунвай чун завалдик.
Баркалла квез, азизбур,
Дикъет хуьзвай кьегьалдиз!
* * *
Загьидин Кьасумоваз — Къизлярда прунзчивилин “Нива” ООО-дин директордиз:
Сагърай, дустар, сидкьи куь,
Зегьметчияр — Сарсарар!
Дуьгуьдалди саф, михьи,
АцIурзавай базарар!..
* * *
Заур Алисултановаз — алимдиз, физикадинни математикадин илимрин доктордиз, РФ –дин Президентдин грантрин сагьибдиз:
Илим тухуз виликди,
КIвалахзава кьиливди.
Гьейранзава алемар
Гузвай гьар са теклифди!
* * *
Зейнаб Гьасанбеговадиз — ДГМУ -дин студенткадиз, 2020-йисан Виридуьньядин илимдин марафондин гъалибчидиз:
Фагьум-фикир лап цIийи
Алакьна раиж ийиз.
Гаф авач ви чирвилиз —
Гьейранна дуьнья михьиз!
* * *
Имам Мирзоеваз — цIийи тадаракар, технологияр кардик кутазвай “ЭОС” клиникадин кьилин духтурдиз:
Тадаракар, дарманар —
Вирибур я цIийибур.
Чилел къвезвай мугьманар
Вири ийиз дирибур!
* * *
Имран Омарбеговаз — Санкт-Петербургдин Военно-космический академиядин курсантдиз, Москвада ЧIехи Гъалибвилин параддин иштиракчидиз:
Хьунухь ихьтин парадда
Гьар кьегьалдин мурад я.
Машгьур я хва виридаз
Женгчивилин устад яз!
* * *
Камил Мегьамедоваз — РД-дин карчивилинни инвестицийрин Агентстводин кьилиз, экономика вилик тухун патал женгинин чархачидиз:
Вилик тухуз карчивал,
Квачиз гьич са харчивал,
Хуьзва хци замандиз
Хазинайрин башчивал!
* * *
Куьреви Мансураз — алимдиз, милли лезги литературадин ирсинин геле къекъвезвай меценатдиз, Етим Эминакай цIийи ахтармишунрин автордиз:
Акьван ашукь Эминал,
Хва аватIа мад чина?
Шаирдин чIал нур я ваз,
Авахьзавай Ракъинай!
* * *
Магелан Саидоваз — РД-дин гиряйрин спортдин федерациядин регьбердиз, милли спортдин жуьрейриз рехъ ачухзавай хциз:
Кар амукьдач гъутарихъ,
Майдан кьурла путари.
Шалбуз дагъдин сагъвал хьуй
Спортдин чи дустарихъ!
* * *
Магьмуд ва Абдулжелил Абдулкеримовриз — Хуьруьга “Люминари” центр несилриз багъишнавай бубадизни хциз:
Пара хьурай девлетар,
ТIимил тежез гьуьрметар!
Гележегди гуда квез
Мадни чIехи къиметар!
* * *
Марат Шайдаеваз — меценатдиз, карчидиз, лап цIийи имаратар хайи хуьруьз багъишзавай хциз:
Тарифарда акурда
ЦIийи крар Цмурдал:
— Чи рухвайри хайи чил
Дуьнья тирвал машгьурда!
* * *
Мегьамед Ибрагьимоваз — шаирдиз, “Лезги газетдин” кьилин редактордиз, ФЛНКА-ди тешкилнавай, журналист Р.Микаилован тIварунихъ галай премиядин сад лагьай лауреатдиз:
Жегьилвилин гьевесдив
Рехъ давамра сересдиз!
Тарифарни тебрикар
Мад къведа ви терездиз!
* * *
Набиюллагь Керимхановаз — хъенчIин къапарин устIардиз — устаддиз, гзаф килигунрин гъалибчидиз:
Рахазва къе чпикай:
— Устадар я Испикар!
Чепедал чан акьалтда,
Себеб хьана гъиликай!
* * *
Назир Гьажибубаеваз — “Дагдизель” завод АО-дин чIехи векилдиз ва вири коллективдиз:
Завод цIийи тIвар алай
Къагьриманрин кар алай
Ачух хьурай куь гьар югъ
Мадни михьи зар алаз.
* * *
Наида Уружевадиз — ДГМУ-дин акушервилинни гинекологиядин кафедрадин асистентдиз, “Вуздин илим. Инновация” — международный форумдин гъалибчидиз:
Майданар гуз илимдиз,
Къаст ава чи алимдихъ;
Гьар са къени хизанда
Сагъламвал жен кьилинди!
* * *
Нариман Гъазалиеваз — девирдин карчидиз, хайи лезги чIал, культура, ирс несилри хуьн паталди вири крариз куьмекзавай спонсордиз:
Чаз чида: и Нариман
Я девирдин къагьриман!
Бубайрин ирс хуьн патал
Женгинава даима!
* * *
Низами Атамоваз — Къизлярдин электромеханический заводдин коммерциядин директордиз:
Девирдин я зарбачи,
Амадаг я зурба чи!
АцIурзава бюджетдиз
Хийир гъидай турба чи!
* * *
Рагьман Мурадоваз — манидардиз, вири хъсан крарин миресдиз, халкьдин мярекатрин мерд куьмекчидиз:
Миресрикай мирес я,
Крар гьакьван серес я.
Мани — мецел, чIагъанни
Гьамиша саз гьевес я!
* * *
Салман Бабаеваз — РФ-дин ракьун рекьерин машгьур пешекардиз, меценатдиз:
Бул хьурай ви багъишар —
Чи несилрин алхишар!
Рекьер, муькъвер, эквер я
Ви гъилерин нехишар!
* * *
Селим Сефербеговаз — дуьньядин программистрин акъажунрин гъалибчидиз:
КьепIирви хва, сагърай вун,
Ихьтин цIийи кар чидай!
Программист дуьньядин
Къе виридаз тIвар чида!
* * *
Станислав Абдулкеримоваз — гьуьле батмиш жезвай 4 кас санал къутармишай кьегьалдиз:
Мусибатдин къужахдай
Уьмуьрар хуьн саламат
Тушни мегер Игитвал —
Махара жер аламат!
* * *
Сулейман Керимоваз — сенатордиз, девирдин карчидиз, меценатдиз:
Рекьер атIуз тIугъвалдин,
Женг чIугвазва кьегьалдиз!
Мерд хьурай мад къилих ви!
Гьа кар хьурай синих ви!
* * *
Тимур Гьабибоваз — Тагьирхуьруьн-Къазмайрал алай надир багъдин сагьибдиз, тарарин цIийи жинсер арадал гъизвай алимдиз:
Гьихьтин цIийи емишар,
Жезва ина битмишар!
Алем хуьнин женгина
Ава чи хва гьамиша!
* * *
Умар Исламоваз — “Инсан” фондунин Ахцегьрин отделенидин кьилиз, меценатдиз:
Дагълух куьгьне хуьрериз
Хьун паталди алакъа,
Интернетдин чилиниз
Гузва кьетIен тIалакьар.
* * *
Фарман Шайдабеговаз ва Гьасан Гьасановаз — “Леки” фондунин векилриз, халкь патал лишанлу крарин сагьибриз:
Къуй куь руьгьдин мергьямат
Даим хьурай саламат!
Кьакьан хьурай генани
Куь фондунин дарамат!
* * *
Фахми Кьасумоваз — Эминхуьряй тир фермердиз, зегьметчи, зарбачи механизатордиз:
Сагьиб чIехи зегьметдин,
Рехъ гуз чIехи девлетдиз,
Агакьрай ви гьунаррив
Гьар са патай къимет дуьз!..
* * *
Хидир-Зулдан Юнусоваз — СКФО-дин художникрин “Юг России” фестивалдин гъалибчидиз:
Суьгьуьрдалди рангарин
Тамаринни рагарин
Алакьзава девирдин
Рагъулвилер кукIвариз!..
* * *
Шариф Шагьмардановаз — художникдиз, скульптордиз, ЧIехи Гъалибвилин 75 йисан юбилейдиз бахшна хкажнавай “Гъам чIугвазвай диде” — зурба мемориалдин автордиз:
Гъамар чIугур дидейрин
Руьгьер жедач лекейрик!
Гранитда, мермерда
Хуьда абур невейри!
* * *
Эхирдай жувазни:
ЦIийи йисан варцел къе
Рахурна рикI чарчел къе.
Тостар лугьуз дустариз,
Ала мягькем кIвачел къе.
“Лезги газетдин” редакциядин коллективдин
тIварунихъай тебрикар кхьейди Мерд Али я.
