Гьажибегов Мирзегьасан Гьажибегович 1936-йисан 9-майдиз виликан Кьасумхуьруьн райондин Берекар хуьре гзаф аялар авай хизанда дидедиз хьана. Буба, Гьажибегов Гьажибег, дяведин сифте йикъара (1941-йис) Ватандал гьужумнавай душмандихъ галаз дяве чIугваз гуьгьуьллудаказ фронтдиз фена. А чIавуз Мирзегьасанан анжах 5 йис тир. Адан рикIел и вахт са уьтери алама. Мад адаз — буба, бубадизни вичин тухум давамардай хва ахкун кьисмет хъхьанач.
Бубадилай бязи вахтара пуд пипIен кагъазар хкведай. Сталинграддин женгерилай кьулухъ абурни хтун хъувунач. Амма хизандал “Гел галачиз квахьна” лагьай чIулав хабар агакьна. Диде Фатумади гъуьлуьн кагъазрал вилерилай накъварин селлер ракъурзавай… Мирзегьасанавай дидеди чIугвазвай гъам эхиз жезвачир, ада дидедихъай вири кагъазар чуьнуьхнай.
Гьар гьикI ятIани, дидедини хци уьмуьрдин юлдаш ва буба фронтдай хтуникай умуд атIузвачир. Йисар физвай — буба хквезвачир…
Мектеб акьалтIарна Мирзегьасан Азербайжандиз фена, Бакуда судостроительный заводда рабочий яз кIвалахал акъвазна. 1955-1958-йисара Советрин Армиядин жергейра къуллугъна хтайла, ВЛКСМ-дин Мегьарамдхуьруьн райондин комитетдин инструктор яз кIвалахдив эгечIна.
1960-йисуз ам Ставрополдин алакъадин электротехникумдиз гьахьна. Ана заочнидаказ кIелна, “почтадин алакъа” пеше къачуна. 1962-йисалай, Самурдин ва Тагьирхуьруьн почтадин отделенийрин начальник яз, ада Мегьарамдхуьруьн райондин са жерге хуьрерин агьалийриз къуллугъна. Ада чIугвазвай намуслу ва гьакъисагъ зегьметдилай районэгьлияр рази тир.
Мирзегьасана вичин бубадин гел жагъурун давамарзавай. Вичелай алакьдай кьван вири чкайриз: ведомствойриз, уьлкведин архивриз чарар рекье твазвай. Гьа икI, 1967-йисан ноябрдиз — Октябрдин революциядин 50 йис тамам хьунин юбилей къейдзавайла, уьлкведин оборонадин министерстводин Центральный архивдай адаз чар хтана. Ана кхьенвай: “Советрин Армияда сержантар ва аскерар гел галачиз квахьунин гьахъ-гьисабдин документрал асаслу яз, тайинарнава: стрелок Гьажибегов Гьажибег 1942-йисуз Сталинграддин патарив телеф хьана ва ам стхавилин сурара кучукнава…”.
Дяве акьалтIна 25 йис алатайла бубадикай хабар хтана. Чпел тIварар алачир сурар уьлкведин ва Европадин чилерал гьикьван алатIа?!
Мирзегьасан Гьажибеговичан лайихлувилер ва пешекарвал орденар ва медалар гуналди къейднава: “Знак Почёта”, “Зегьметдин ветеран”, “В.И.Ленинан 100 йис тамам хьун”. Адакай “Почтадин алакъадин лайихлу къуллугъчи” лагьай тIварцIин ва гьуьрметдин грамотайрин сагьибни хьана.
2001-йисан 16-июндиз ам чавай гьамишалугъ яз къакъатна. М.Гьажибегован экуь къамат ам чидайбурун, адан кIвалахдилай разибурун ва кIвалахдал къимет эцигайбурун рикIера гьамишалугъ амукьда.
Къагьриман Шихмурадов,
Юсуф Акимов
