Жегьил кIелдайбурун «Чан алай классика» фондуни  28-декабрдиз Дагъустандин  мектебра  кIелзавай аялар патал Б.Щукинан тIварунихъ галай институтдин педагогрин патай онлайн мастер-классар  кьиле тухуда.

Актервилин бажарагъдиз ва сегьнедал рахадай жуьредиз  талукь мастер-классда 10-17 йисарин яшда авай аялривай иштиракиз жеда. Абур муниципалитетар патал тайинарнавай вахтунда  трансляциядик экечIун лазим я.

ИкI, сад лагьай мастер-класс 28-декабрдин нянин сятдин 4-далай 5-далди Агъул, Акуша, Ахвах, Ах­цегь, Бабаюрт, Ботлих, Гергебил, Гумбет, Гуниб, Докъузпара, Казбек, Къайтагъ, Къаякент, Рутул, Тляра­та­ районар ва Дербент шегьер патал кьиле фида.

Кьвед лагьайди гьа и йикъан  сят­дин 17:10-далай 18:10-дал кьван вахтунда жеда. Ана иштиракда: Дер­бент, Къизилюрт, Къарабудахкент, Къизляр, Къули, Кьурагь, Лак, Леваши, Мегьарамдхуьруьн, Но­гъай,­ Сулейман-Стальский, Табасаран, Унцукуль ва республикадин  ке­ферпатан мад са шумуд районди.

Пуд лагьай мастер-класс  нянин сятдин 7-даз 20 декьикьа кIва­лахайла башламишда. Адан иштиракчияр Махачкъала, Буйнакск, Хасавюрт, Каспийск, Къизляр, Къизилюрт, Избербаш, Дагъустандин Огни шегьеррай ва Хасавюрт, Хив, Къумтуркъала, Серго­къала, Хунзах, ЦIумада, Цунти, Ча­рода ва Буй­накск районрай тир аялар жеда.

Къейдзавайвал, мастер-классар кIелдайбурун конкурсдин юбилейдин йисаз гьазур хьунин сер­гьятра аваз кьиле тухузва.

«Чан алай классика» конкурсди гьар йисуз дуьньядин уьлквейрай тир агъзурралди  аялар тупламишзава.  Икьван еке акъажунар кьиле физвай конкурсда Дагъустандай тир кIелдайбуру виниз тир нетижаяр къалурзава ва супер-финалда пишкешдин чкаяр кьазва, хабар гузва РД-дин образованидинни илимдин министерстводин информациядин къуллугъди.

«Лезги газет»