Мукьвара Белиж поселокдин гимназиядин актовый залда акьалтзавай несил патал Интернетдин хаталувилин ва хийирлувилин месэлайриз талукь яз диде-бубайрин собрание хьана.
Мярекатда Дербент райондин кьил Мегьамед Желилова, райондин администрациядин кьилин заместитель Садир Эмиргьамзаева, Белиж поселокдин кьил Рамиз Гьабибуллаева, РУО-дин начальник Суфиян Надирова, райондин администрациядин жегьилрин ва туризмдин крарай отделдин начальник Рафиль Гьажиагьмедова, райондин администрациядин информациядин отделдин начальник Тарлан Алекперова, гимназиядин директор Нариман Шихмегьамедова, диде-бубайри, муаллимри ва школьникри иштиракна.
Веревирд авур кьилин месэла диде-бубайри чпин аялрив гвай мобильный телефонрал гуьзчивал тухун тир.
М.Желилова акьалтзавай несилди азад вахт дуьз кечирмишуниз лайихлу фикир гуникай, райондин жегьилар спортдин массовый жуьрейрал желбуникай лагьана.
— Са шумуд йис я, къецепатан уьлквейрин информациядин къурулушри Россиядихъ галаз информациядин дяве тухуз, — лагьана Т.Алекперова. — ИкI, абур Россиядин усал къамат арадал гъиз алахънава. Интернетда чун жезмай кьван игьтиятлу, дикъетлу хьун лазим я. Къе чун акьалтзавай несил Интернетдилай аслу хьунин месэлайрал гьалтнава.
Диде-бубаяр чпин аялри менфят къачузвай интернет-ресурсрикай хабардар хьун чарасуз герек я. Аялар чирвилерин информация авай интернет-чешмейрал желбна кIанда.
Меркездин сергьятраваз мад Суфиян Надиров, Фатулла Фетуллаев, Нариман Шихмегьамедов, Айна Сеидова ва масабур рахана. Абурун виридан фикир сад тир: терроризмдиз, экстремизмдиз, чlуру къугъунриз талукь соцсетра авай чинрин чилина гьат тавун патал аялрин арада гъавурда тунин кlвалах тухун, хаталу соцгруппайриз гьахьунин рехъ агалун ва икI мад. Инсандин мефтlедиз ва психикадиз интернет-къугъунри ийизвай таъсирдикай фильм къалуруналди мярекат акьалтlарна.
Къагьриман Ибрагьимов
