Чун уьмуьрдин экуь рекьел акъудзавай муаллимдин зегьмет гьикьван четинди ятIа, виридаз чизва. Диде-бубади хьиз, муаллимдини гьар са аялдихъ галаз галатун течиз кIвалах тухузва, чакай савадлу, кIвалахдин гъавурда авай, яшайишдин уькIуь-цуру чидай ватандашар хьун патал гьакъисагъвилелди зегьмет чIугвазва.
Заз Мегьарамдхуьруьн райондин Хуьрелрин юкьван мектебдин лезги чIаланни эдебиятдин ва урус чIаланни эдебиятдин тежрибалу муаллим Рамазанова Диляра Бубаевнадикай суьгьбет ийиз кIанзава.
Уьмуьрдин рехъ намуслувилелди тухузвай ва везифайриз вафалувал хуьзвай Диляра муаллим 1950-йисан 10-ноябрдиз Хважа-Къазмайрин хуьре дидедиз хьана. Огни шегьерда “Горянка” тIвар алай школа-интернатда хъсан къиметралди кIелна, ам Дагъустандин государстводин педагогвилин институтдин филологиядин факультетдик экечIна ва 1974-йисуз анаг яру дипломдалди акьалтIарна.
Кьадар-кьисметди марифатлу муаллим Хуьрелрин хуьруьз акъудна. Аялрал рикI алай Диляра муаллимди, 1975-йисалай эгечIна, Хуьрелрин хуьруьн юкьван мектебда цIудралди несилриз чирвилер ганва.
Дугъриданни, образованидин къурулушда 45 йисуз зегьмет чIугун лап чIехи гьуьрметдиз лайихлу кIвалах я. Диляра Бубаевнади аялрин диде-бубайрихъ галаз сих алакъа хуьзва, абуруз хъсан меслятар гузва. Гьавиляй адаз мектебдин педколлективдин, гьам диде-бубайрин ва хуьруьн жемятдин арада чIехи гьуьрмет ава.
Муаллимди вичин кIвалахда эвелимжи чкадал акьалтзавай несил ватанпересвилин гьиссерал алаз тербияламишунин месэла эцигнава.
РикI гваз эгечIайла, гьар са кIвалахди хъсан нетижаярни гуда. Диляра муаллимдин гъилик кIелзавай ученикри гьар йисуз районда ва республикада кьиле физвай жуьреба-жуьре олимпиадайра, конкурсра кIвенкIвечи чкаяр кьазва.
Жуваз чирвал гайи, писни хъсан кьатIуз чирай муаллимдикай рахун са акьван регьят кIвалахрикай туш. Диляра муаллим акурла, зи рикIел гьамиша жува мектебда кIелай йисар хкведа. А бахтлу ва садрани тикрар техжер легьзеяр! За жуван мектебдин йисар гьамиша пIузаррик хъвер кваз рикIел хкизва.
Пешедал рикI алай гьар са муаллимдин мурад вичин гъилик кIелай аялрикай уьмуьрда намуслу, гайи чирвал квадар тийидай ва гьамиша агалкьунралди рикI шадардай ватанпересар хьун я. Зи яратмишунрин рекье хьайи гьар са агалкьун муаллимди вичин агалкьун хьиз кьабулзава, гьар сеферда сифтени-сифте заз зенгна мубаракзава.
Алай йисан 10-ноябрдиз Диляра Бубаевнадин 70 йис тамам хьанва. Зи сейли муаллимдиз вичин 70 лагьай зул за рикIин сидкьидай мубаракзава. Сифтени-сифте чандин сагъвал ва кIвалахда агалкьунар хьана кIанзава. Сагърай, муаллим!
Зи муаллимдиз
Зал зегьметар чIугуна на,
Халис инсан хьун паталди.
Писни хъсан чириз хьана,
Даим дуьз рехъ кьун паталди.
Чун садрани пайнач на
Хайибуруз, тахайбуруз.
Мектебдин рехъ ахъайнач на,
Хьана чаз гьахъ меслятар гуз.
Зун паталди вакай сифте
Заз илимдин чирагъ хьана.
Чирвилерин туна рекье,
Заз чим гудай са рагъ хьана.
На зи рикIе илгьамдин цIай
КуькIуьрна гьич хкахь тийир.
За лугьузва къе ваз “сагърай”,
Вакай рикIе хьана заз пIир.
Владик Батманов,
РФ-дин писателрин Союздин член
