* * *
И йикъара республикадин здравоохраненидин уьмуьрда лишанлу вакъиа кьиле фена: Дагъустандиз медицинадин къуллугъчийрин игьтияжар патал “Патриот УАЗ” маркадин 42 машин чара авунва. РД-дин здравоохраненидин министерстводин пресс-къуллугъди хабар гузвайвал, машинар Урусатдин Гьукуматдин къарардин бинедаллаз уьлкведин промышленностдин ва алишверишдин министерстводи маса къачуна.
Къейд ийин хьи, цIийи улакьрин куьмекдалди участковый духтурар медицинадин рекьяй куьмек герекзавай дагъустанвийрин кIвалерив агакьарда. Абуру “тади куьмекдин” везифаяр тамамарда.
Мукьвара республикадин здравоохраненидин министерстводи милли “Здравоохранение” проектдин сергьятра аваз санай масаниз тухуз жедай рекъемрин 6 флюорографни 1 мобильный амбулатория маса къачуна. Флюорографар Къизилюрт, Мегьарамдхуьруьн, Табасаран, Сулейман-Стальский, Хасавюрт ва Ногъай районрин, амбулатория Буйнакскдин кьилин духтурханайриз рекье туна.
* * *
Дагъустанда коронавирусдин тIугъвалдиз акси вакцинация давам жезва. РД-дин здравоохраненидин министерстводин пресс-къуллугъдин малуматралди, алатай гьафтедин эхирра республикадив “Гам-КОВИД-Вак” вакцинадин 800 доза агакьна.
Дагъларин уьлкведа сифте яз коронавирусдиз акси рапар ягъайбур духтурар я. Лагьана кIанда, чи республикада вакцина ягъайдалай кьулухъ инсандиз пис хьайи дуьшуьшар садни авач.
Алай вахтунда Дагъустанда коронавирусдиз акси рапар медицинадин 27 идарада язава. Махачкъалада — поликлиникайрани инфекцийрин азаррин центрада, амай шегьеррани районра — кьилин духтурханайра.
* * *
Милли “Здравоохранение” проектдин сергьятра аваз Дагъустанда йисан эхирдалди модульный 30 ФАП кардик акатда. Абурукай 26 эцигна акьалтIарнава, амай 4 объектни йисан эхирдалди ишлемишиз вахкудайвал я.
Къейд ийин хьи, 30 ФАП-дикай 10 республикадин бюджетдин такьатрихъ эцигнава. РД-дин здравоохраненидин министерстводин пресс-къуллугъди хабар гузвайвал, ФАП-ар, сифте нубатда, абурун игьтияж гьи хуьрера гзаф ятIа, гьанра ахъайзава.
«Лезги газет»
