Мукьвара Нальчикда женгинин ва спортдин самбодай СКФО-дин чемпионат кьиле фена. Ана и округдик акатзавай республикайрай атанвай 200-далай виниз спортсменри (итимри ва дишегьлийри) иштиракна. Абурун арада Россиядин, Европадин ва дуьньядин чемпионатрин гъалибчиярни призерар авай. Гьавиляй чемпионатда акъажунарни къизгъиндаказ кьиле фена. Дагъустандин хкянавай командади 31 медаль къазанмишна.
Спортдин самбодай СКФО-дин чемпионвилин тIвар къачурбурун арада вичин ери-бине Сулейман-Стальский райондин Алидхуьрелай тир Аслан Къурбановни авай. 88 кг-дин заланвиляй майдандиз экъечIна, 5 касдин винел инанмишвилелди гъалибвал къачуналди, ам къизилдин медалдиз, кубокдиз ва пулдин приздиз лайихлу хьана.
Чемпионатда 1, 2 ва 3-чкаяр кьур амай спортсменрихъ галаз санал, Аслан Къурбанова къведай йисан февралдиз Москвада самбодай кьиле фидай Россиядин чемпионатда иштиракда.
Лагьана кIанда, республикадилай яргъарани машгьур пагьливанрин — Къурбановрин сихилдай тир Аслан самбодайни дзюдодай Россиядин спортдин мастер, универсальный женгерай 4 сеферда дуьньядин чемпион, спортдин международный классдин мастер я.
Къачунвай чемпионвилин тIвар мубарак авуналди, чаз Аслан Къурбановахъ спортдин рекье мадни еке агалкьунар хьана кIанзава.
Хазран Кьасумов
