2021-йисуз Дербент шегьердив 21 миллиард манатдин кьадарда аваз инвестицияр агакьда. Идакай Дагъустандин Государстводин секретарь Хизри Абакарова хабар гана.
Къадим шегьердин виликан мэрдин гафаралди, бюджетдинбур тушир пулдин такьатар “ЦIийи шегьер” тIвар алай проект кьилиз акъудунин карда харждайвал я. Къейд ийин хьи, Дербентдин кьибле пата инвестицийрин еке проект гъиле кьадайвал я: ина 15 агъзур агьали гьакьдай алай аямдин цIийи микрорайон эцигда. Райондин центрада лагьайтIа, мискIиндикай, килисадикай ва синагогадикай ибарат руьгьдин надир имарат хкаждайвал я.
Мадни Хизри Абакарова хабар гайивал, “вад гъетрен” 3-4 мугьманхана эцигуниз 10 миллиард манат пул харжда. Дербентда ихьтин дараматар эцигиз кIанзавай карханаярни майдандиз экъечIнава.
«Лезги газет»
