21-декабрдиз Ахцегь райондин депутатрин собранидин нубатдин сессия кьиле фена. Адан сергьятра аваз депутатри Осман Магьмудович Абдулкеримов нубатдин сеферда райондин кьил яз хкя хъувуна.
О.М.Абдулкеримов 1968-йисуз Ахцегь райондин Хуьруьгрин хуьре дидедиз хьана. Волгограддин хуьруьн майишатдин институт, “финансар ва кредит” пешекарвиляй бизнес идара авунин институт (институт управления бизнесом) акьалтIарна.
2013-йисалай Ахцегь райондиз регьбервал гузва.
* * *
Ислен юкъуз, 21-декабрдиз, Дербентдин депутатрин собраниди шегьердин кьил яз Рустамбег Седретдинович Пирмегьамедов хкяна. Идакай “Лезги газетдиз” муниципалитетдин пресс-къуллугъди хабар гана.
Шегьердин депутатрин собранидин сессияда 30 касди иштиракна. Вад касди чпин паталай сес гудай ихтияр собранидин председатель Мавсум Рагьимоваз ганвай. Дербентдин администрациядин кьилин къуллугъ патал 5 касди документар вуганвай. Конкурсдин бинедаллаз абурукай 2 кас хкяна: вахтуналди шегьердин кьилин везифаяр тамамарзавай Рустамбег Пирмегьамедов ва шегьердин кьилин заместитель Артур Гьамзатов. Депутатри шегьердин кьил яз абурукай Рустамбег Пирмегьамедов хкяна.
Р.С.Пирмегьамедов 1983-йисан 18-февралдиз дидедиз хьана. Урусатдин Минюстдин правовой академия акьалтIарна. 2018-йисалай инихъ Дербент шегьердин администрациядин кьилин сад лагьай заместитель яз кIвалахзавай.
* * *
22-декабрдиз Дербент райондани депутатрин собранидин сессия кьиле фена. Адан сергьятра аваз депутатри муниципалитетдин цIийи кьил хкяна. “Лезги газетдиз” райондин пресс-къуллугъди хабар гайивал, и къуллугъ Мавсум Гьилалович Рагьимовал ихтибарна.
М.Гь.Рагьимов 1963-йисан 11-июлдиз Дербент шегьерда дидедиз хьана. Иваново шегьердин энергетикадин институт, Воронеждин экономикадинни праводин институт, Урусатдин халкьдин майишатдин карханаяр патал регьбервал гудай пешекарар гьазурдай Президентдин махсус программа акьалтIарнава.
Райондин кьил яз хкядалди вилик Мавсум Рагьимова Дербент шегьердин депутатрин собранидин председателдин везифаяр тамамарзавай.
«Лезги газет»
