22-декабрдиз Дагъустандин Кьилин везифаяр вахтуналди тамамарзавай Сергей Меликова Москвада сагъламвал мягькемарна республикадиз хтайдалай кьулухъ сад лагьай совещание кьиле тухвана. Адан кIвалахда Гьукуматдин членри, исполнительный гьукумдин органрин регьберри, шегьерринни районрин кьилери иштиракна.

Мярекатдал веревирд авур месэлайрикай сад Дагъустандин Гьукуматдин цIийи къурулуш арадал гъуниз талукь тир. Региондин Кьили къейд авурвал, министррин цIийи кабинет йисан эхирдалди арадал гъана акьалтIардайвал я.

“За ачухдиз лугьузва: исятда вице-премьеррин ва министррин къуллугъар патал кандидатар хкягъунин жигьетдай кIвалах кьиле тухузва. Сифте нубатда, кар алай, финансринни экономикадин кIва­лахрихъ галаз алакъалу министррин”, — лагьана ада. Сергей Меликован гафаралди, къуллугъдал акъваззавай кас эвелни-эвел регьбервал гудай алакьунар авай, крар идара ийиз алакьдай, низам-къайда хуьдай, гьахъвал гвай пешекар хьун лазим я. “Къуллугърал тайинардай чIавуз гъа­латIризни рехъ гун мумкин я, гьикI ла­гьайтIа, инсандин кIвалахдиз ада вичел их­тибарнавай везифаяр кьилиз акъуддайла къимет гуз жеда. Эгер гъалатIар хьайи­тIа, чна тайин тир къуллугъдин истемишунриз жаваб гуз алакьдай кандидатар суракьда. Вучиз лагьайтIа, къе Дагъустан­да арадал атанвай гьалар анжах пешекарривай къайдадик кухтаз же­да”, — алава хъувуна Сергей Меликова.

Малум хьайивал, Гьукуматдин цIийи къурулушда 7 вице-премьер жеда ва гьар сада кьилдин хилериз регьбервал гуда.

Дагъустан вилик финиз манийвал гузвай месэлайрикай рахадайла, республикадин Кьили ахьтинбурукай сад яз инфраструктурадихъ галаз алакъалу гьаларин тIвар кьуна. Адан фикирдалди, чи­лин­ни эменнидин алакъайрин къурулушдиз, дериндай чирна, къимет гана кIанзава. “И кIвалахдив чун эгечIнава, анжах ам менфятлудаказ кьиле тухузвач”,- лагьана Сергей Меликова, и жигьетдай бязи муниципалитетрин кьилериз гудай са жерге суалар авайди къейд авуналди.

Кьилди къачуртIа, Сергей Меликова бязи муниципалитетра чилеринни эменнидин алакъайриз къимет гунин жигьетдай кIвалах кьиле физвай къайдадилай вичин наразивал къалурна. Ада гьисабзавайвал, ихьтин гьалар арадал атун бязи районрин кьилериз чпи регьбервал гузвай муниципалитетра чилерин, мулк-эменнидин гьакъиндай гьахъ-гьисабар тухун са акьван хуш тахьунихъ галаз алакъалу я. Региондин кьилин фикирдалди, важиблу и кардив ихьтин къайдада эгечIунин себеб абурукай (районрин, шегьеррин кьилерикай — авт.) бязибур чилихъ галаз, къанунсуздаказ объектар эцигунихъ галаз алакъалу гьиллейрин иштиракчияр хьун я. Сергей Меликова муниципалитетрин кьилериз чилинни эменнидин алакъайриз къимет гунин жигьетдай кIвалах цIийи къайдада тешкилуниз эвер гана.

Дагъустанда коронавирусдин вилик пад кьунин сергьятра аваз кьабулзавай серенжемрикай рахадайла, Сергей Меликова алатай сеферда Оперативный штабдин заседание тухвайдалай инихъ гьалар хъсан хьанвайди ва им виридан лайихлувал тирди къейдна. Гьа са вахтунда, республикадин кьилин фикирдалди, тамамарна кIанзавай крарни пара ама.

С.Меликова совещанидал хабар гайивал, РД-дин здравоохраненидин министрдин везифаяр вахтуналди тамамарзавай Жамалудин Гьажиибрагьимова вич алай къуллугъдикай азад авун тIалабна­ва. “Здравоохраненидин министрди вич къуллугъдикай азад авун тIалабзава. Ихь­тин къарардиз ни таъсирнатIа, заз чидач. Белки, министерстводин кIвалахди­лай, зи фикирдалди, гьахълудаказ ийизвай на­разивилер, я тахьайтIа, чун кIвалах­див эгечI­­за­вай цIийи къайдаяр я же­ди… Гьар гьикI ятIани, вири гьахълудаказ кьиле физва: эгер инсанди вичел ихтибарнавай везифаяр вичивай кьилиз акъудиз тежедайди гьиссзаватIа, ша чна ахьтин касдиз кIва­лахдилай элячIдай мумкинвал гун”, — лагьана ада ва Гьукуматдин Председатель Абдулпатах Амирхановал здравоохраненидин министрдин везифаяр вахтуналди тамамардайди тайинарун тапшурмишна.

Сергей Меликова республикадин здравоохраненидин къурулушда дегишвилер тунин игьтияж авайдини къейдна. Агьалийрилай къвезвай арзайра къара­гъар­завай месэлайрикай кьвед лагьай чкадал медицинадин рекьяй ийизвай къуллугърин еридиз талукь суалар ала. “ЦIийи­­вилер, дегишвилер вири хилера ту­на кIанзава, амма, сифте нубатда — здравоохраненида, гьикI лагьайтIа, и хел инсандин сагъламвилихъ галаз алакъалу я”, — алава хъувуна ада.

Республикадин агьалийрилай къвезвай арзайрикай рахадайла С.Меликова къейд авурвал, абурун чIехи паюна чиновникри жергедин агьалияр рикIелай ракъурзавайдакай, арзайриз, месэлайриз, тIалабунриз жавабар тагуз, абурун ихтиярар чIурзавайдакай лагьанва. Республикадин Кьили шегьерринни районрин кьилериз ва маса органрин векилриз агьалийрин месэлайриз лазим къайдада фикир гуниз, гьа жергедай яз, гзаф чкайра мукьвал-мукьвал эквер хкатунал эхир эцигуниз эвер гана.

Совещанидин сергьятра аваз Дербент шегьердиз кьетIен дережа (статус) гуниз, Махачкъала, Каспийск, Избербаш шегьерар хъвадай хъсан еридин целди таъминаруниз, эцигунрин, ЖКХ-дин хилериз талукь месэлаярни веревирдна.

Совещанидикай гегьеншдиз Дагъустандин Кьилин сайтдай кIелиз жеда.

Агьмед  Магьмудов