Алатай гьафтедин кишдиз, 19-декабрдиз, чи арадай Дагъустандин машгьур композитор, Урусатдин искусствойрин лайихлу деятель, СССР-дин ва РФ-дин композиторрин Союздин член, Дагъустандин Государстводин премийрин лауреат, чIехи ватанперес Мегьамед Азизханович Гьуьсейнов акъатна.
Мегьамед Гьуьсейнова Дагъларин уьлкведин музыкадин культурадик кутунвай пай екеди я. Композиторди симфониядин “Дагъустандин музыкадин рангар” сюита, драмадин “Эмин” поэма, тарни оркестр патал “Лезги рапсодия”, трагедиядин “Намусдин наразивал” фреска, “Шарвили” опера, рутулрин лирикадин “Лалаандин авазар” кантата, вокалдинни симфониядин, камерный эсерар, тамашаяр, фильмаяр, хор, эстрададин манияр патал гзаф кьадар гьаваяр кхьена. Санлай къачурла, Дагъустандин искусствойрин лайихлу деятелдин гъиликай жуьреба-жуьре жанрайрин 200-далай виниз эсерар хкатна. Республикадин культура патал чIехи ирс тунвай Мегьамед Гьуьсейнов Дагъустандин композиторрин мектебдин юкьван несилдин векил тир.
М.А.Гьуьсейнов 1941-йисан 2-февралдиз Рутул райондин Хъуьлуьдрин хуьре дидедиз хьана. Композитордин рехъ ада Махачкъаладин музыкадин училищеда чирвилер къачунилай гатIунна. ММУ-дик экечIай чIавуз М.Гьуьсейнован 14 йис тир, амма и карди адаз нотаяр чирунин, фортепианодал къугъунин жигьетдай са манийвални ганач. Училище акьалтIарайдалай кьулухъ жегьил пешекарди Дербентдин культпросветучилищеда кIвалахна. Гуьгъуьнлай М.Гьуьсейнова Москвадин культурадин государстводин институтда кIелна, армиядин жергейра къуллугъна.
Жуьреба-жуьре йисара Мегьамед Гьуьсейнова “Дагъустан” ГТРК-да отделдин заведующий, художественный радиопрограммайрин кьилин редактор, РД-дин культурадин министрдин заместитель, Дагъустандин операдинни балетдин гостеатрдин художественный руководитель яз зегьмет чIугуна. 2015-йисалай инихъ ада гьа и театрда музыкадин паюнин заведующий яз кIвалахзавай.
Мегьамед Гьуьсейнова республикада кьиле фейи медениятдин хейлин мярекатра — конкурсра, концертра, советра, тамашайра жюридин член яз иштиракна. Гьар са вакъиадиз къимет гудайла, ада сифте чкадал пешекарвал эцигдай.
Мегьамед Гьуьсейнов хайи чIалахъ, медениятдихъ, халкьдихъ рикI кузвай чIехи ватанперес, герек чIавуз гьамиша куьмек гуз гьазур вафалу дуст, чарадан гьалдикай хабар кьадай къени инсан тир. Гьахьтинди яз ам чи рикIерани амукьда.
“Лезги газетдин” редакциядин коллективди Мегьамед Азизханович Гьуьсейнов рагьметдиз финихъ галаз ала-къалу яз адан хизанриз, вири мукьва-кьилийриз башсагълугъвал гузва.
«Лезги газет»
