11-декабрдиз Сулейман-Стальский райондин КIварчагърин хуьре цIаяр хкадардайбурун (пожарный) часть ачухуниз талукьарнавай шадвилин мярекат кьиле фена. Ана РД-дин МЧС-дин министр Нариман Къазимегьамедов кьиле аваз министерстводин жавабдар къуллугъчийри, райондин кьил Нариман Абдулмуталибова, Махачкъаладай, Дербентдай атанвай багьа мугьманри, махлукьатди иштиракна.
Сифте гаф райондин кьил Нариман Абдулмуталибов рахана. Ада МЧС-дин министр Нариман Къазимегьамедов, атанвай мугьманар тебрикна, 5000-далай виниз агьалияр яшамиш жезвай КIварчагъ дереда цIаяр хкадардайбурун часть эцигун ва ачухун санлай район патал лишанлу ва шадвал кутадай вакъиа тирди къейдна. Идай МЧС-диз ва подрядный тешкилатдиз чухсагъул лагьана.
Рахунрилай гуьгъуьниз Нариман Абдулмуталибова райондин вилик лайихлувилерай РД-дин МЧС-дин министр Нариман Къазимегьамедовав “Сулейман-Стальский райондин гьуьрметлу агьали” лагьай лишан (знак) вахкана.
Министр Нариман Къазимегьамедова къейд авурвал, пожарный цIийи частуни неинки КIварчагъ дередин ва и райондин агьалийриз, гьакIни патарив гвай Хив ва Табасаран районрин хуьрерин 10 агъзурдалай виниз агьалийриз къуллугъда. Ада цIийи частуниз МЧС-дин патай телевизор ва ноутбукни пишкешна.
Лишанлу вакъиадиз талукь мярекатдал КIварчагърин хуьруьн агъсакъалрин Советдин председатель Межид Межидовни рахана.
Пожарный цIийи часть ачухунин ярж тир яру лент атIун Нариман Къазимегьамедовал, Нариман Абдулмуталибовал ва Межид Межидовал ихтибарна.
Шадвилин мярекат Дагъустандин лайихлу артист Омар Меликова, манидарар тир Эрзиман Османова, Расул Абдулкебирова, Шихбала Шихсаидова, райондин аялрин яратмишунрин кIвалин рушарин дестеди, КIварчагърин культурадин кIвалин хорди манияр лугьуналди мадни гурлу авуна.
Хазран Кьасумов
