Дагъустандин здравоохраненидин министерстводин пресс-къуллугъди хабар гузвайвал, сезондин гриппдиз акси рапар ягъунин серенжемрин сергьятра аваз пуд лагьай кварталда республикадиз гриппдин са шумуд жуьредиз талукь яз 1,2 миллион доза вакцина агакьнава. Йисан эхирдалди мадни 500 агъзурдан кьадарда аваз вакцина ахгакьун вилив хуьзва. Рапар ягъунал гьалтайла, артух фикир кIвачел заланзавай дишегьлийриз, аялриз ва хаталубурун дестедик акатзавай ксариз гуда.
Пешекарри тестикьарзавайвал, гриппдиз акси рапар ягъун азардин вилик пад кьунал гьалтайла виридалайни нетижалу серенжем я. ГьикI хьи, ахьтинбур гриппдик азарлу хьунин дережа хейлин сеферра агъуз аватзава. Эгер акатайтIа, ам кьезилдиз, яни бедендиз зарар тахьана алатда. Коронавирусдикай хаталувал авай алай девирда и жуьредин рапар ягъунихъ мадни еке менфятлувал авайди къейдзава абуру. Гигиенадин къайдайрал амал авуни, маскаяр алукIуни грипп акат тавуниз куьмекзавайдал, амма абур гьар кьве сятдилай дегишарун лазим тирди, и вахт алатайла абурун менфятлувал неинки квахьзавайди, гьатта абур чпин иесидиз хаталу тирдални фикир желбзава.
Чи мухбир
